СЫР БОЙЫЛЫҚ АУЫЛ ОҚУШЫЛАРЫ «МЫҢ БАЛА» ЖӘНЕ «IQANAT» ОЛИМПИАДАЛАРЫНДА ҮЗДІК НӘТИЖЕ КӨРСЕТТІ

Өңірлер қимасында олимпиада жеңімпаздарының саны Қызылорда облысында жылдан жылға артып, көш басында келеді, - деп хабарлайды Opennews.kz ақпарат агенттігі.
Екінші жыл қатарынан облысымыздың ауыл мектептеріндегі 5-6 сыныптың жүзге жуық оқушысы еліміздің жетекші мектептерінде білімін жалғастыруға мүмкіндік алуда.

Биылғы оқу жылында «Мың бала» олимпиадасына қатысу үшін ауыл мектептерінің 5-6 сынып оқушыларынан 11 255 қатысушы тіркеліп, ең көп балл жинаған 903 жеңімпаз іріктелді. Олимпиаданың екінші кезеңде дарынды оқушылар академиялық білімге баға беретін компьютерлік тестілеуге қатысып, 209 бала олимпиада жеңімпазы атанды.

Министрліктің арнайы квоталарына сәйкес 6-сыныпты аяқтаған 28 жеңімпаз оқушы дарынды балаларға арналған мамандандырылған мектептерінде білімдерін жалғастыру мүмкіндігіне ие болды. Олар Республикалық физика-математика мектебінде, «Білім-Инновация» лицейлерінде, «Дарын» мамандандырылған мектептерінде оқуға жолдама алып, еліміз бойынша қатысудың жоғары көрсеткішімен аймағымыз үздік үштіктен көрінді.

Ал 8-9 сыныптар арасында өтетін «IQanat» олимпиадаcына аудандар бойынша 3 847 оқушы тіркеліп, бақтарын сынады. Олимпиаданың II кезеңіне 697 оқушы өтіп, нәтижесінде Республикалық кезеңге 35 бала жолдама алып, оқушылар Нұрсұлтан қаласындағы Назарбаев университетінде Оқу-ағарту министрі Асхат Аймағамбетовтың қатысуымен өткізілген слетке қатысты.

Олимпиада қорытындысы бойынша аймағымыздың 3 дарынды оқушылары «Iqanat High School of Burabay» мектебіне жолдама алса, 2 оқушы тарих пәні бойынша жүлделі орындарға ие болды. 

Қызылорда облысының білім басқармасының баспасөз қызметі