Тізесі ауырған ер адам екпе алғаннан кейін көз жұмды

Қазақстанның Денсаулық сақтау министрлігі Екібастұзда 40 жастағы ер адамның қазасынан кейін медициналық тексеріс жүргізуді бастады, - деп хабарлайды "Opennews.kz" ақпарат агенттігі.

Жеңіс Бекжігітов есімді азамат тізесіне жасалған инъекциядан кейін төртінші күні көз жұмған. Марқұмның туыстары оның өліміне медицина қызметкерлерін жауапты деп санайды.

Белгілі болғандай, ер адам 8 қыркүйекте Екібастұздағы жеке хирургиялық орталыққа жүгінген. УДЗ қорытындысынан кейін оған оң тізе буынының остеоартриті диагнозы қойылып, буын ішіне укол жасау ұсынылған.

10 қыркүйекте инъекция жасалғаннан кейін келесі күні оның аяғы ісініп, қатты ауыра бастаған. Жағдайы біртіндеп нашарлаған: дене қызуы көтеріліп, есін жоғалтқан сәттері болған, қан қысымы түсіп кеткен.

Туыстарының айтуынша, жедел жәрдем қызметі ер адамды ауруханаға жатқызудан бас тартқан. 13 қыркүйекте жақындары оны өздері медициналық мекемеге жеткізген. Сол күні кешке клиника бас дәрігері хабарласып, орталықта ӨЖЖ аппараты жоқ екенін айтып, пациентті қалалық аурухананың жан сақтау бөліміне ауыстырғандарын жеткізген. Алайда келесі күні ер адам қайтыс болды.

Осы оқиғадан кейін Медициналық және фармацевтикалық бақылау комитеті Екібастұздағы бірнеше медициналық ұйымдарды тексеруді бастады.

Тексеру барысында заңбұзушылықтар анықталған жағдайда, материалдар құқықтық баға беру және процессуалдық шешім қабылдау үшін полицияның тергеу бөліміне жолданады.