Дәрігерлер қазақстандықтарға қауіпті инфекция туралы ескерту жасады

Санитариялық-эпидемиологиялық бақылау комитеті қазақстандықтарға менингококк инфекциясының алдын алу бойынша ұсыныстар әзірледі,-  деп хабарлайды Оpennews.kz  ақпарат агенттігі.

Менингококк инфекциясы – жедел менингит (ми қабықтарының қабынуы), менингококк сепсисі (қанның инфекциялануы), кейде назофарингит (мұрын мен жұтқыншақтың шырышты қабығының қабынуы) түрінде көрінуі мүмкін жұқпалы ауру.

Белгілері

Алғашында кәдімгі суық тиюге ұқсас белгілер байқалады:

мұрыннан су ағу;

жөтел.

Одан кейін аурудың негізгі белгілері пайда болады:

дене қызуының 38–40 градусқа дейін көтерілуі;

кенеттен құсу;

қатты бас ауруы;

бастың шалқайып, аяқтың ішке қарай бүгіліп, ішке тартылуы;

басты кеудеге қарай еңкейткенде қарсылықтың байқалуы;

басқанда жоғалмайтын, жұлдыз тәрізді күлгін-қызыл бөртпенің пайда болуы.

Ауру ауа-тамшы жолы арқылы, яғни жөтелгенде, түшкіргенде және сөйлескенде жұғады. Мамандардың айтуынша, бұл инфекциямен көбіне бір жастан екі жасқа дейінгі балалар, сондай-ақ 30 жасқа дейінгі жастар ауырады. Аурушаңдық қыс-көктем мезгілінде артады.

Менингококк инфекциясы кереңдікке, балалардың ақыл-ой дамуының тежелуіне, сирек жағдайларда сал ауруына әкелуі мүмкін.

Алдын алу шаралары

денені қатты тоңдырмау;

адам көп жиналатын орындарға баруды шектеу;

күн тәртібі мен тамақтану режимін сақтау;

суық тиген жағдайда медициналық маска тағу;

бөлмені үнемі желдетіп, ылғалды тазалау жұмыстарын жүргізу;

науқаспен байланыста болған жағдайда 10 күн бойы медициналық бақылауда болу.

Санитариялық-эпидемиологиялық бақылау комитеті менингококк инфекциясы кезінде өз бетінше емделуге болмайтынын ескертеді.