Қызылорда облысында тұмау жұқтырғандар саны артты

Қызылорда облысында жыл басынан бері тұмау жұқтырғандар саны өткен жылғы  кезеңмен салыстырғанда 39 пайызға артты,- деп хабарлайды Opennews.kz ақпарат агенттігі.

Өңірде 2021-2022 жылдардағы эпидмаусымда жедел респираторлық вирусты инфекциясына (ЖРВИ) шалдығудың 19745 дерегі тіркелді. Олардың 64,7 пайызы 14 жасқа дейінгі балалардың. Оның ішінде 24,1 пайызы – 1 жасқа дейінгі нәрестелер. Есепте тұрған жүкті әйелдер арасындағы ЖРВИ-ға шалдығу көрсеткіші 25 пайыз.

Жүргізілген эпидемиологиялық мониторингке сәйкес өңірде эпидахуалдың күрделенуі байқалған жоқ.

«Өткен жылдың ұқсас мерзімімен салыстырғанда аурушаңдық деңгейі 39 пайызға жоғары», - деп мәлім етті облыстық Санитариялық-эпидемиологиялық бақылау департаменті.

Тұмау ауруының алдын алу мақсатында 2021-2022 жылдардағы эпидмаусымға 80186 доза вакцина сатып алынған болатын. Өңір тұрғындары арасында тұмауға қарсы вакциналанған контингент 95,6 пайызға жуық.