Қызылорда тұрғынының 2 млн теңгесін қолды қылған алаяқ ұсталды

Белгілі болғандай, облыс орталығының тұрғыны үй иесінен "үйдің баспалдағын жасап беретініне" сендіріп, 2 миллион теңгеден астам ақшасын алған. Бұл оқиға былтыр болса да келісілген уәде орындалмаған. 

Үй иесі уәдесін орындамаған тұрғынның үстінен шағымданып, полицияға жүгінді. Шағым бойынша облыстық полиция департаментінің қызметкерлері күдіктіні ұстады. Ол кінәсін мойындап, оған қатысты "ешқайда кетпеу және өзін дұрыс ұстау туралы қолхат" түріндегі бұлтартпау шарасы қолданылды.

Қылмыстық кодекстің 190-бабы 1-бөлігімен сотқа дейінгі тергеп-тексеру амалдары жүргізіліп жатыр. Онда алаяқтық, яғни бөтеннің мүлкін жымқыру немесе алдау немесе сенімді теріс пайдалану жолымен бөтен мүлiкке құқықты иемдену жағдайы көрсетілген.