Жалағаш ауданында әлеуметтік-экономикалық даму мәселелері қаралды

22 қазан 2025, 10:11

1 547

Бүгін аудан әкімі Ардақ Ибраимовтың төрағалығымен шағын құрамда мәжіліс өтті. Жиын барысында ауданның 2025 жылдың 9 айындағы әлеуметтік-экономикалық даму қорытындылары мен бюджеттің орындалу барысы қаралды, - деп хабарлайды "Opennews.kz" ақпарат агенттігі.

Күн тәртібіндегі негізгі мәселе – аудан экономикасының барлық салаларындағы даму қарқынын талдау және жыл соңына дейінгі жоспарларды нақтылау болды.

Негізгі көрсеткіштер бойынша өсім байқалды

Есепті кезеңде аудан экономикасы тұрақты өсім қарқынын сақтап отыр.

Өнеркәсіп өндірісі 25,5 пайызға артып, жалпы көлемі 30 млрд 382 млн теңгені құрады. Бұл көрсеткіш аудан кәсіпорындарының өндірістік белсенділігінің артқанын көрсетеді.

Негізгі капиталға тартылған инвестициялар көлемі 15 млрд 516 млн теңге болып, жоспар 101 пайызға орындалды. Инвестициялық белсенділік жаңа өндіріс нысандары мен инфрақұрылымдық жобаларды жүзеге асыруға мүмкіндік беріп отыр.

Ауыл шаруашылығы саласында да тұрақты өсім бар: 2025 жылдың 9 айында өндірілген өнім көлемі 23 млрд 685,1 млн теңгеге жетіп, жоспар 101,1 пайызға орындалды. Бұл ретте мал және егін шаруашылықтарының өнімділігі артқан.

Құрылыс саласында 8 млрд 959 млн теңгенің жұмыстары атқарылып, өткен жылдың сәйкес кезеңімен салыстырғанда 111,9 пайыз өсім тіркелді.

Бөлшек сауда айналымы 3 млрд 81,6 млн теңгені құрап, жоспар толық орындалды.

Тұрғын үй құрылысы да қарқын алып, 108 жеке тұрғын үй пайдалануға берілді. Жалпы көлемі 17 648 шаршы метрді қамтыған бұл көрсеткіш өткен жылдың осы кезеңімен салыстырғанда 100,7 пайызды құрады.

Әкім нақты тапсырмалар берді

Кеңес барысында аудан әкімі Ардақ Ибраимов қол жеткізілген нәтижелермен қатар, жыл соңына дейін жоспарланған барлық экономикалық көрсеткіштерге толық қол жеткізудің маңыздылығын атап өтті.

– Біз үшін басты мақсат – экономикалық өсімді тұрақты деңгейде ұстап тұру және бюджет қаражатының тиімді жұмсалуын қамтамасыз ету. Әрбір тиын халықтың игілігіне бағытталуы тиіс. Сондықтан қаржыны сапалы әрі уақтылы игеру, жоспарды нақты орындау – әр бөлім басшысының басты міндеті, – деді Ардақ Ибраимов.

Әкім сондай-ақ экономикалық көрсеткіштерге тұрақты бақылау орнатып, салааралық үйлесімділікті арттыруды, бюджет қаражатының мақсатты жұмсалуын қамтамасыз етуді тапсырды.

Жиын соңында аудан әкімі тиісті сала басшыларына нақты тапсырмалар жүктеп, алдағы кезеңге арналған міндеттерді айқындады.

Ауданның әлеуметтік-экономикалық даму көрсеткіштерінде байқалған оң динамика алдағы уақытта да жалғасын тауып, өңірдің тұрақты өркендеуіне негіз болмақ.