Қызылордада шатыры ұшқан мектеп оқу жылына дайын емес

Қалаға қарасты Тасбөгет кентінде шатыры ұшып кеткен екі мектепте әлі күнге құрылыс жұмыстары басталмаған, - деп хабарлайды "Opennews.kz" ақпарат агенттігі “Информбюро” бағдарламасына сілтеме жасап.

Тасбөгет кентіндегі №257 мектептептің шатыры 2 ай бұрын қатты жел кезінде ұшып кеткен.  Бірақ ғимараттың жабыны содан бері тұр екен. Жаңа оқу жылының басталуына аз уақыт қалса да, жөндеу жұмыстары басталмаған. 

Тұрғындардың сөзінше, қазір төбеде қалған жабын қатты жел соқса құлап кетуі мүмкін. Ата-аналар шенділердің жайбасарлығының кесірінен балалар қауіпті мектепте оқиды дейді. 

Ал шенеуніктер 2 ай бойы бюджеттен қаражат бөлінгенін күткендерін мәлімдеді. Айтуларынша, қазір мемлекеттік сатып алу конкурсы жарияланған.

Екі мектептің шатырын жөндейтін құрылыс компаниялары әлі де анықталмаған. Сөйте тұра білім ұяларының басшылары 1-қыркүйекке дейін ғимараттың кем-кетігін қалыпқа келтіруге уәде берді.