Мотоциклмен жедел жәрдем: Қармақшыдағы жағдай елді елең еткізді

23 шілде 2025, 10:20

2 339

Қызылорда облысына қарасты Қармақшы ауданындағы жедел жәрдем қызметі әлеуметтік желі қолданушыларын таңқалдырды. Интернетте тараған бейнежазбада шұғыл медициналық көмек көрсетуге шыққан қызметкерлердің арнайы көлікпен емес, мотоциклмен жолға шыққаны көрініс тапқан, - деп хабарлайды "Opennews.kz" ақпарат агенттігі.

Аталған бейне көпшіліктің назарын аударып, қоғамда түрлі пікірлер туғызды. Қолданушылар «Дипломмен ауылға», «Байғұс медиктарға жағдай жасалмаған», «Сорлы скорыйлар», «Мигалка қайда, көлік берілмеген бе?» сынды пікірлер жазып, мәселені ашық талқылауда.

Неліктен қызметкерлерге қызметтік көлік берілмеген? Емханаға ала кету керек пациентті қалай тасымалдайды? Жолдың нашарлығы осылай қатынауға себеп пе?

Бұл жағдай денсаулық сақтау жүйесіндегі ауылдық жерлерде орын алып отырған инфрақұрылымдық және материалдық-техникалық қамтамасыз ету мәселелерін тағы бір мәрте алға тартты.

Ауылдық жерлерде медициналық қызметтің қолжетімділігі мен сапасына қатысты мұндай жағдайлар бұрын да кездескен. Медицина саласы мамандарының айтуынша, шалғай елді мекендерде жиі көлік тапшылығы, жолдың нашарлығы және материалдық базаның әлсіздігі секілді қиындықтар орын алып отырады.

Бұл оқиға – тек бір ауданға тән емес, еліміздегі көптеген ауылдарда кездесетін жүйелік мәселенің көрінісі болуы мүмкін. Сондықтан әлеуметтік желідегі реакциялар мен жарияланған бейне қоғамдағы шынайы жағдайды бейнелейді деуге болады.