Қалада әлеуметтік-экономикалық дамудың негізгі көрсеткіштері талқыланды: жыл соңына дейін нақты міндеттер белгіленді

15 қазан 2025, 12:24

2 241

Облыс әкімінің төрағалығымен өткен мәжілісте өңірдегі бюджет қаражатының игерілуі, негізгі макроэкономикалық көрсеткіштердің орындалуы және әлеуметтік-экономикалық даму қарқыны жан-жақты қаралды. Бұл маңызды жиынның қорытындысы ретінде қала әкімдігінде де арнайы кеңес ұйымдастырылып, шаһар басшысы Нұржан Ахатов алдағы кезеңге қойылатын міндеттерді нақтылап өтті, - деп хабарлайды "Opennews.kz" ақпарат агенттігі.

Макрокөрсеткіштер – қала дамуының айнасы

Қаланың 2025 жылғы даму жоспарының үш тоқсаны артта қалды. Қазіргі кезең – атқарылған жұмыстарды бағалап, жыл соңына дейінгі мақсаттарды нақтылауға аса жауапты уақыт. Сондықтан шаһар басшысы Нұржан Сәбитұлы:

"Бұл бағыттағы жұмыстарды әлде де ширатып, макрокөрсеткіштерді нақты әрі толық орындау – басты міндет. Жылдық межені орындау – қала тұрғындарының әл-ауқаты мен өңірдің тұрақты дамуы үшін аса маңызды", – деп атап өтті.

Ол әлеуметтік-экономикалық өсімді қамтамасыз ету тек жоспар орындаумен шектелмей, әр саладағы нақты көрсеткіштерге қол жеткізуді талап ететінін айтты.

Бюджет қаражаты – тиімділік пен нәтижеге жұмыс істеуі тиіс

Кеңесте бюджет қаржысының игерілуі де басты назарда болды. Жыл соңына қарай орындалуы тиіс жобалар мен міндеттемелердің дер кезінде атқарылуы үшін қаржыны тиімді әрі мақсатты жұмсау қажет.

"Бюджет қаражатын игеру – стратегиялық маңызы бар мәселе. Уақытылы әрі сапалы игерілмеген қаржы – орындалмаған әлеуметтік бастама, жүзеге аспаған инфрақұрылым, күткен көмегін ала алмаған тұрғын", – деді қала әкімі.

Жиында бірқатар салаларда қаржы игеру көрсеткіштерінің төмен екені атап өтіліп, жауапты басқарма басшыларына егжей-тегжейлі талдау жүргізу тапсырылды. Сонымен қатар, кемшіліктерді тез арада түзету, жыл соңына дейін жоспарланған жобаларды мерзімінде аяқтау бойынша нақты шаралар қабылдау қажет екені айтылды.

Инвестиция тарту мен әлеуметтік жобалар – дамудың локомотиві

Кеңес барысында инвестициялық ахуал мен әлеуметтік салалардағы жобалардың орындалу барысы да талқыланды. Инвестиция көлемін арттыру арқылы жаңа жұмыс орындарын құру, бизнес бастамаларды қолдау, инфрақұрылымды дамыту сияқты мәселелер өзекті күйінде қалып отыр.

Қала әкімінің айтуынша, инвестициялық жобалардың уақытылы іске асуы – аймақтық экономикаға оң әсерін тигізеді. Сол себепті, әкімдік тарапынан әрбір жоба бойынша жеке бақылау жүргізіліп, қолдау көрсетілуі керек.

Алда нақты жұмыс, жауапты бақылау бар

Нұржан Ахатов жиын соңында әр сала бойынша нақты нәтижеге бағытталған жұмысты күшейту, барлық ресурсты тиімді пайдалану және жұмысты үйлестіруде тәртіп пен жауапкершілік орнату керектігін ескертті.

"Қазір сылтау айтатын емес, нақты нәтижемен есеп беретін уақыт. Әр басқарма, әр бөлім өз саласындағы кемшіліктерді жойып, жыл соңына дейін жоспарланған жұмыстарды толық орындауға күш салуы керек", – деді шаһар басшысы.

Қаланың экономикалық дамуы мен тұрғындардың әл-ауқатын арттыру – ортақ мақсат. Осы орайда, барлық басқармалар мен бөлімдерге дербес жауапкершілік жүктеліп, жұмыс тиімділігін арттыру міндеті қойылды.

Жылдың соңғы тоқсаны – қорытынды кезең, сондықтан жоспарды орындап қана қоймай, сапалы нәтижеге қол жеткізу – басты талап болып отыр.