Қала күніне орай «Мерейлі мерекеңмен, Қызылорда!» атты гала-концерт өтті

17 қазан 2025, 12:01

1 529

Бүгін Қызылорданың сол жағалауындағы еңселі «Қайсар Арена» стадионында Сыр елінің басты мерекесіне айналған ерекше шара – Қызылорда қаласының астана болғанына 100 жыл толуына және Қала күніне арналған салтанатты «Мерейлі мерекеңмен, Қызылорда!» атты гала-концерт өтті, - деп хабарлайды "Opennews.kz" ақпарат агенттігі.

Мерекелік кешке Абай облысының әкімі Берік Уәли, Қазақстан Республикасы Парламенті Сенаты мен Мәжілісінің депутаттары, мемлекет және қоғам қайраткерлері, Қазақстанның Еңбек Ерлері, ғалымдар, өнер майталмандары, сондай-ақ еліміздің барлық өңірлерінен келген облыстық мәслихат төрағалары қатысты.

Тарихқа тағзым – жаңарған Қызылордаға тағылым

Шараның шымылдығы тарихи көріністермен түрілді. Орынбордан Ақмешітке астананы көшіру, Қазақ Республикасының ресми түрде Қазақ АКСР атануы, қаланың Қызылорда деп аталу сәті сахналық қойылым арқылы әсерлі бейнеленді.

Көріністерде Алаш арыстарының бейнелері, «Қызыл паравоздың» Ақмешітке бағыт алуы, сол дәуірдің рухы мен елдік идеясы көрініс тапты. Бұл сахналық эпизодтар көрерменнің көңілін толқытты, ғасыр бұрынғы тағдырлы сәттерді көз алдарына әкелді.

Кейін экран бетінде Қызылорданың бүгінгі келбеті — заманауи сәулеті, жасыл желекке бөленген көшелері, жаңарған инфрақұрылымы мен өркендеген әлеуметтік нысандары бейнеленіп, шежірелі шаһардың жаңа дәуірдегі дамуы паш етілді.

Аймақ басшысының құттықтау сөзі

Мерекелік жиында облыс әкімі Нұрлыбек Нәлібаев сөз алып, барша Сыр жұртын тарихи мерейлі күнмен құттықтады.

«Бір ғасыр бұрын Қазақ Республикасының алғашқы астанасы болған Қызылордада мемлекеттігіміздің негізі қаланды. Сол кезеңде қаламыз еліміздің саяси, мәдени-рухани орталығына айналды. Ұлттық өнер мен ғылымның, білім мен баспасөздің алтын қазығы осында қағылды. Шежірелі шаһарымыздың елдік асыл мұраты, жасампаз жолы қалыптасты. Тілегі мен мақсаты ортақ Алаш арыстары ұлт мүддесі үшін тәуелсіз ел болуға бірікті. «Отан – елдің анасы, Ел – ердің анасы! Сыр – Алаштың анасы!» – деді аймақ басшысы.

Облыс әкімі сөзінде өңірдің қазіргі даму қарқынына да тоқталып өтті.

«Бүгінгі таңда Президентіміздің айрықша қолдауымен Сыр өңірі қарқынды дамып келеді. Соңғы үш жылда облыс экономикасына 1 триллион 600 миллиард теңгеге жуық инвестиция тартылды. Аймақ бюджеті 851 миллиард 300 миллион теңгеге жетіп, 2022 жылдан бері 233 пайызға өсті. Бұл қаржы тұрғындардың тұрмыс сапасын жақсартуға, әлеуметтік нысандар салуға және өзекті мәселелерді шешуге бағытталып отыр. Ең ғажап қала – адамның бақытты болған жері. Баршамызды бақыт құшағына алған Қызылорда – біздің мақтанышымыз!»

Сахна сәні мен өнер өрнегі

Кеш барысында Жанар Ысқақова, Гүлнұр Оразымбетова, Мөлдір Сәдуақасова, Жеңіс Төлепбай сынды танымал эстрада жұлдыздары орындаған «Біздің Қызылорда» әні көрерменнің ерекше ықыласына бөленді.

Сонымен қатар, Кенжебек Әлімжан, Төреғали Төрәлі, Оразалы Нұралиев және өзге де өнер майталмандары мерекелік көңіл-күй сыйлап, сахна төрін ән мен биге бөледі.

Мерекенің мазмұнын байытқан би қойылымдары, тақырыптық бейнероликтер, және дрон-шоу көрінісі ерекше әсер қалдырды. Түнгі аспанды мың бояулы отшашу жарықтандырып, мерекенің шарықтау шегін айшықтады.

Қызылорда – елдіктің алтын бесігі

Бұл мерекелік шара Сыр елінің өткені мен бүгіні тоғысқан ерекше тарихи сәт болды. Бір ғасырлық жылнаманы еңсерген Қызылорда бүгінде жаңарған бейнесімен, өркендеген экономикасымен және мәдени келбетімен ел дамуының маңызды орталықтарының біріне айналып отыр.