Қызылордада 242 жасөспірім ойын - сауық орталықтарында ұсталды

5 наурыз 2026, 11:30

2 508

28 ақпан мен 2 наурыз аралығында Қызылорда облысында республикалық «Жасөспірім» жедел профилактикалық іс-шарасы өтті,- деп хабарлайды Opennews.kz ақпараттық агенттігі Kazinform.kz сайтына сілтеме жасап.

Облыстық полиция департаментінің қоғамдық қауіпсіздік басқармасы хабарлағандай, осы үш күнде 320 әкімшілік хаттама рәсімделген. Кәмелетке толмаған 14 адам ішкі істер органдарының есебіне алынып, қадағалаусыз және панасыз қалған 3 жасөспірім кәмелетке толмағандарды бейімдеу орталығына жатқызылған.

- Бала тәрбиесі бойынша міндетін орындамаған 29 ата-анаға хаттама толтырылған. Кәмелетке толмаған адамды жәбірлеудің (буллинг, кибербуллинг) 1 дерегі анықталып, ата-анасына хаттама толтырылды. Кәмелетке толмағандардың түнгi уақытта ойын-сауық мекемелерiнде болуына жол берген 15 орынның иелері мен әкімшілік меңгерушілеріне хаттама рәсімделді. 6 жағдай бұзақылық жасау, 10 жағдай түнгі тыныштықты бұзу, 242 жағдай ойын-сауық орындарында және үйінен тыс жерде беймезгіл жүруге байланысты, — делінген хабарламада.

Одан бөлек 19 ата-ана кәмелетке толмағандарды тәрбиелеу, оқыту және (немесе) бағып-күту жөніндегі міндетін орындамайтын, олардың мінез-құлқына теріс әсер ететін кәмелетке толмағандардың ата-аналары мен заңды өкілдерінің профилактикалық есебіне алынған.