Қызылорда облысында білім беру нысандарындағы күзет қызметінің дайындығы тексерілді
Қызылорда облысы Полиция департаментінің Күзет қызметін бақылау бөлімінің қызметкерлері білім беру ұйымдарында күзет қызметін жүзеге асыратын жеке күзет ұйымдарының жұмысына жоспарлы түрде кешенді тексеру жүргізді.
Іс-шараның негізгі мақсаты – оқу орындарындағы қауіпсіздік деңгейін арттыру, төтенше жағдайлардың алдын алу, сондай-ақ күзет қызметтерінің жедел әрекет
ету қабілетін жан-жақты бағалау болып табылады. Осы бағытта полицейлер білім беру нысандарында орнатылған дабыл түймелерінің жұмысын тексеріп, олардың нақты жағдайда қаншалықты тиімді іске қосылатынын бақылаудан өткізді.
Тексеру барысында дабыл сигналы берілген сәттен бастап жедел ден қою топтарының оқиға орнына жету уақыты, олардың іс-қимылдарының үйлесімділігі мен нақты алгоритм бойынша әрекет етуі сараланды. Сонымен қатар, күзет қызметкерлерінің қызметтік міндеттерді орындау тәртібі, құжаттарының дұрыстығы, техникалық құралдарды пайдалану деңгейі және қауіпсіздік талаптарын сақтау мәселелері де назардан тыс қалмады.
Полицейлер төтенше жағдайлар кезінде күзет қызметкерлерінің шұғыл әрі дұрыс шешім қабылдау қабілетіне, сондай-ақ білім беру мекемелерінің әкімшілігімен өзара байланысына ерекше көңіл бөлді. Өйткені мұндай жағдайларда әр секундтың маңызы зор екені белгілі.
Мамандардың айтуынша, білім беру мекемелеріндегі қауіпсіздік – қоғам үшін аса маңызды әрі жауапты бағыттардың бірі. Оқушылар мен педагогтердің қауіпсіздігін қамтамасыз ету – құқық қорғау органдары мен күзет ұйымдарының басты міндеттерінің бірі болып қала береді. Осыған байланысты жеке күзет ұйымдарының қызмет сапасын арттыру, олардың кәсіби даярлығын жетілдіру және заманауи қауіпсіздік жүйелерін енгізу жұмыстары тұрақты бақылауда ұсталады.
Сонымен қатар, тексеру нәтижелері бойынша анықталған кемшіліктерді жою жөнінде нақты ұсыныстар беріліп, күзет қызметкерлеріне қосымша нұсқаулықтар түсіндірілді. Алдағы уақытта мұндай бақылау шаралары тексеру ғана емес, тәжірибелік оқыту мен біліктілікті арттыруға бағытталған форматта да жалғасын табады.
«Заң мен тәртіп» қағидаты аясында қоғамдық қауіпсіздікті қамтамасыз етуге бағытталған осындай іс-шаралар жүйелі түрде жүргізіліп, білім беру нысандарындағы қауіпсіздік деңгейін одан әрі нығайтуға ықпал ететін болады.
Фото: ©kzo_pd
