ҚАЗАЛЫДА ТЕМІРБЕТОН ӨНДІРЕТІН КӘСІПОРЫН ЖҰМЫСЫМЕН ТАНЫСЫП, ҰЖЫММЕН КЕЗДЕСТІ

12 мамыр 2026, 14:30

1 506

AMANAT партиясы Қызылорда облыстық филиалының төрағасы Жандос Базартай Қазалы ауданына жұмыс сапарымен барып, бірқатар өндірістік және қоғамдық маңызы бар нысандардың жұмысымен танысты. Сапар барысында ол еңбек ұжымдарымен кездесіп, өңірдегі өндіріс саласының дамуы мен әлеуметтік бастамалардың жүзеге асырылу барысын талқылады.

Жұмыс сапарының алғашқы бағыты темір-бетон бұйымдарын шығаратын «LCI-MK» ЖШС-нің Қазалы филиалы болды. Кәсіпорынның бүгінгі жағдайымен танысу барысында зауыт басшысы Сәбит Өтегенов өндірістік процестер мен кәсіпорынның даму жоспарлары туралы кеңінен ақпарат берді.

Кәсіпорынның тарихы 1982 жылдан бастау алады. Сол уақыттан бері өндіріс орны құрылыс саласына қажетті темір-бетон бұйымдарын шығарып, еліміздің инфрақұрылымдық дамуына елеулі үлес қосып келеді. Бүгінде зауыт заманауи технологияларды енгізу арқылы өндіріс қуатын арттырып, сапалы өнім шығаруға басымдық беріп отыр.

Өндірістік кешеннің жалпы аумағы 4,3 гектарды құрайды. Оның ішінде 5800 шаршы метрден астам аумақта заманауи жабдықтармен қамтамасыз етілген өндірістік цехтар орналасқан. Мұнда бетон құю, қалыптау, арматура дайындау және дайын өнімді өңдеу сияқты толық циклді өндіріс жолға қойылған.

Зауыт жылына 10 000 шаршы метрге дейін темір-бетон бұйымдарын өндіруге қауқарлы. Өнімдер мемлекеттік стандарттарға толық сәйкес келеді және құрылыс саласының түрлі бағыттарында – тұрғын үй құрылысы, жол инфрақұрылымы, өндірістік ғимараттар мен әлеуметтік нысандар салуда кеңінен қолданылады.

Кәсіпорын тапсырыс берушілердің сұранысына қарай әртүрлі күрделіліктегі және көлемдегі өнімдерді дайындайды. Бұл өз кезегінде құрылыс саласындағы жобалардың уақытылы әрі сапалы орындалуына мүмкіндік береді. Сонымен қатар зауытта жергілікті тұрғындар жұмыспен қамтылып, өңірдегі әлеуметтік тұрақтылыққа үлес қосып отыр. Қазіргі таңда мұнда 80-ге жуық адам тұрақты еңбек етеді.

Сапар барысында Жандос Базартай кәсіпорынның өңір экономикасындағы рөліне ерекше тоқталды. Ол өндіріс орындарының дамуы – аймақтың экономикалық өсімінің негізгі драйверлерінің бірі екенін атап өтті.

– Өндіріс орындары – ел экономикасының тірегі. Мұндай кәсіпорындардың тұрақты жұмыс істеуі, жаңа технологияларды енгізуі және өндіріс көлемін арттыруы – өңірдің дамуына тікелей әсер етеді. Сондықтан «AMANAT» партиясы өндіріс саласын қолдауға бағытталған бастамаларды әрдайым қолдайды, – деді ол.

Сондай-ақ ол кәсіпорынның еңбек ұжымына әлеуметтік қолдау көрсету, жұмысшылардың құқықтарын қорғау және еңбек жағдайын жақсарту бағытындағы жұмыстардың маңыздылығына тоқталды.

Кездесу барысында партия өкілі өндіріс саласындағы өзекті мәселелер мен еңбек ұжымының ұсыныстарын тыңдады. Жұмысшылар тарапынан жалақы, еңбек қауіпсіздігі, өндірістік инфрақұрылымды жаңарту және әлеуметтік қолдау шараларын күшейту жөнінде ұсыныстар айтылды.

Кәсіпорын қызметкерлерімен өткен арнайы кездесуде партияның алдағы міндеттері мен жүзеге асырылып жатқан жобалары туралы да кеңінен ақпарат берілді. Әсіресе өңірде жаңа жұмыс орындарын ашу, кәсіпкерлікті дамыту және жастарды еңбекке тарту бағытындағы бастамаларға ерекше назар аударылды.

Осы сапар аясында «LCI-MK» ЖШС-нің Қазалы филиалы базасында AMANAT партиясы-ның бастауыш ұйымы ресми түрде ашылды. Бұл ұйым кәсіпорын қызметкерлерінің қоғамдық-саяси белсенділігін арттыруға, олардың ұсыныс-пікірлерін партиялық деңгейде көтеруге мүмкіндік береді.

Жандос Нұртайұлы жаңа бастауыш ұйымның ашылуы еңбек ұжымдары мен партия арасындағы байланысты нығайта түсетінін атап өтті. Оның айтуынша, мұндай құрылымдар еңбек адамдарының мәселелерін дер кезінде шешуге және олардың әлеуметтік құқықтарын қорғауға ықпал етеді.

– Біз үшін еңбек адамдарының жағдайы әрдайым басты назарда. Өндіріс орындарындағы жұмысшылардың мәселесін тыңдау, оларды қолдау және нақты шешімдер қабылдау – партияның негізгі міндеттерінің бірі, – деді ол.

Кездесу барысында кәсіпорын ұжымына ел экономикасының дамуына қосқан үлестері үшін алғыс айтылып, бірқатар үздік қызметкерлерге арнайы Алғыс хаттар табысталды. Бұл марапаттар жұмысшылардың еңбегіне берілген жоғары баға ретінде қабылданды.

Өз кезегінде зауыт қызметкерлері арнайы келіп, ұжыммен кездескені үшін ризашылықтарын білдіріп, мұндай іс-шаралардың еңбек адамдарының мотивациясын арттыратынын атап өтті.

Сапар соңында өндіріс орнының жұмысын одан әрі жетілдіру, жаңа технологияларды енгізу және өнім сапасын арттыру бағытында ұсыныстар айтылды. Сонымен қатар жергілікті шикізатты тиімді пайдалану және логистикалық инфрақұрылымды дамыту мәселелері де талқыланды.

Жалпы алғанда, Қазалы ауданындағы бұл жұмыс сапары өңірдегі өндірістік әлеуетті арттыруға, еңбек ұжымдарымен байланысты нығайтуға және партиялық бастамаларды жүзеге асыруға бағытталған маңызды қадамдардың бірі болды.