ҚАЗАЛЫДА ҰЛЫ ЖЕҢІСКЕ ҮЛЕС ҚОСҚАН ТЫЛ АРДАГЕРЛЕРІНЕ ҚҰРМЕТ КӨРСЕТІЛДІ

Бүгін, 09:30

1 507

Ұлы Жеңіс күніне орай Қазалы ауданында тағылымы мол, өнегесі терең мерекелік шара өтті. Аудан әкімі Алмасбек Есмаханов аудандық мәслихат төрағасы Ғазиз Әлішпен және құқық қорғау органдарының басшыларымен бірге тыл ардагерлерінің шаңырағына арнайы барып, мерекемен құттықтады. Сұрапыл соғыс жылдарында тылда аянбай еңбек етіп, Ұлы Жеңісті жақындатуға өлшеусіз үлес қосқан ардагерлерге құрмет көрсетіліп, сый-сияпаттар табысталды.

Ұлы Отан соғысы жылдары ел басына түскен ауыртпалықты көтеріп, бар қажыр-қайратын майдан мен тыл үшін жұмсаған аға буынның еңбегі – кейінгі ұрпақ үшін өшпес өнеге. Қан майданда жаумен шайқасқан жауынгерлердің жеңіске жетуі тылдағы еңбеккерлердің табанды еңбегімен де тығыз байланысты болды. Сол жылдары белі бекіп, буыны қатпаған балалар мен жасөспірімдер егіс алқабында, мал шаруашылығында, өндіріс орындарында тынымсыз еңбек етіп, майданды азық-түлікпен, киім-кешекпен қамтамасыз етуге атсалысты.

Аудан басшысы алдымен Әйтеке би кентінде тұратын 90 жастағы тыл ардагері Қаным Құрманбаеваның шаңырағына арнайы барып, мерекелік құттықтауын жеткізді. Ғасыр жасаған кейуананың өнегелі өмір жолына тоқталған аудан әкімі оның ел үшін атқарған еңбегі әрдайым құрметке лайық екенін атап өтті.

– Сіздер қиын-қыстау кезеңде елдің еңсесін түсірмей, тылда аянбай еңбек еттіңіздер. Майдандағы жауынгерлердің жеңіске жетуіне үлкен үлес қостыңыздар. Бүгінгі бейбіт өмір – сіздердің төккен терлеріңіз бен табандылықтарыңыздың нәтижесі. Сіздерге қандай құрмет көрсетсек те жарасады, – деді аудан әкімі.

Мұнан кейін аудан басшылығы Ұлы Отан соғысының ардагері Шамша Бисембаевтың жары, тыл ардагері Қанымкүл Оспанованың үйіне барып, мерекелік лебізін білдірді. Ардақты ана соғыс жылдарындағы қиын кезеңдерді еске алып, сол уақытта халықтың бірлігі мен төзімі жеңіске деген сенімді күшейткенін айтты.

Сондай-ақ аудан әкімі Жалаңтөс батыр ауылындағы тыл және еңбек ардагері Дәуіт Сайын ақсақалдың шаңырағына арнайы барып, құрмет көрсетті. Өмірін еңбекпен өрген қарияның елге сіңірген еңбегі мен кейінгі ұрпақ тәрбиесіне қосқан үлесі ерекше аталып өтті. Дәуіт ақсақал жастық шағы соғыс жылдарымен тұспа-тұс келгенін, сол кезеңдегі халықтың төзімі мен ауызбіршілігі бүгінгі ұрпаққа үлкен сабақ болуы керектігін жеткізді.

Мерекелік құттықтау барысында аудан басшысы Қазалы қаласында тұратын тыл ардагері Мәлік ақсақалдың үйіне де арнайы барып, ізгі тілегін айтты. Ел ағасының ұзақ жылғы еңбегі мен өнегелі өмір жолы туралы жылы әңгімелер айтылып, ардагерге сый-сияпаттар табысталды.

Кездесу барысында аудан әкімі тыл еңбеккерлерінің Ұлы Жеңіс жолындағы ерен еңбегі ешқашан ұмытылмайтынын ерекше атап өтті. Ол соғыс жылдарында күн-түн демей еңбек еткен тыл ардагерлерінің қажырлы еңбегі бүгінгі бейбіт өмірдің мызғымас негізіне айналғанын айтты.

– Майдандағы жауынгерлерге қажетті азық-түлік пен киім-кешек дайындап, елдің бар ауыртпалығын көтерген тыл еңбеккерлерінің еңбегі – нағыз ерлік. Сіздердің төзімдеріңіз бен сабырлықтарыңыз, елге деген сүйіспеншіліктеріңіз кейінгі ұрпаққа әрдайым үлгі болады. Бүгінгі тәуелсіз еліміздің дамуы мен тыныштығының негізінде сіздердің адал еңбектеріңіз жатыр, – деді аудан әкімі.

Кездесулер барысында ел ағаларының өнегелі ғұмыры, ұрпақ тәрбиесіне қосқан үлесі, ел бірлігін сақтаудағы ақыл-парасаты ерекше құрметпен айтылды. Ақ жаулықты аналардың мейірімі мен ақсақалдардың баталы сөзі қашанда елдің ырысы мен ынтымағының бастауы екені жеткізілді.

Тыл ардагерлері де өз кезегінде көрсетілген құрметке шынайы ризашылықтарын білдіріп, елдің амандығы мен жұрттың тыныштығын тіледі. Ақ баталарын берген қариялар жастарды елін, жерін сүюге, адал еңбек етуге шақырды.

– Бүгінгі бейбіт заманның қадірін білу керек. Ел тыныштығы – ең үлкен байлық. Тәуелсіз еліміз аман болып, жастарымыз білімді, еңбекқор болсын, – деген тілектерін жеткізді ардагерлер.

Тағылымы терең кездесулер ардагерлерге ерекше қуаныш сыйлап, олардың жүрегіне жылулық ұялатты. Ұлы Жеңіс мерекесі қарсаңында тыл еңбеккерлеріне көрсетілген бұл құрмет – ел тарихындағы ерен еңбекті ұлықтаудың, аға буынға тағзым етудің жарқын көрінісі болды.

Бүгінде тыл ардагерлерінің қатары сиреп барады. Сондықтан олардың өмір жолын, ерлікке пара-пар еңбегін жас ұрпаққа насихаттау – баршамыздың ортақ парызымыз. Себебі тыл еңбеккерлерінің төзімі мен табандылығы, елге деген сүйіспеншілігі – тәуелсіз Қазақстанның рухани құндылықтарының бір бөлігі.

Ұлы Жеңіс – тек майдан даласындағы батырлардың ғана емес, тылда еңбек еткен миллиондаған жандардың ортақ жеңісі. Сол себепті тыл ардагерлеріне көрсетілген әрбір құрмет – тарихқа тағзым, ерлікке деген құрмет болып қала бермек.