ҚАЗАЛЫ АУДАНЫ ӘКІМІ ҚОЖАБАҚЫ АУЫЛЫНДАҒЫ ҚҰРЫЛЫС ЖҰМЫСТАРЫНЫҢ БАРЫСЫН БАҚЫЛАДЫ

13 мамыр 2026, 11:30

1 508

Бүгін аудан әкімі Алмасбек Есмаханов аудандық мәслихат төрағасы Ғазиз Әлішпен бірге Қожабақы ауылына арнайы барып, елді мекенде жүзеге асырылып жатқан маңызды инфрақұрылымдық жобалардың құрылыс барысымен танысты. Аудан басшысы «Ауыл – Ел бесігі» бағдарламасы аясында салынып жатқан спорт кешенінің және «Қазалы – Қожабақы – Бозкөл – Кәукей» автожолындағы көпір құрылысының сапасын бақылап, мердігер мекемелер мен жауапты сала басшыларына нақты тапсырмалар жүктеді.

Қазіргі таңда Қожабақы ауылында тұрғындардың әлеуметтік жағдайын жақсартуға бағытталған бірқатар маңызды жобалар жүзеге асырылуда. Соның бірі – ауыл жастары мен тұрғындарының игілігі үшін салынып жатқан заманауи спорт кешені. Бұл нысан ауылдағы бұқаралық спортты дамытуға, жастардың салауатты өмір салтын ұстануына және спортпен тұрақты айналысуына мүмкіндік береді.

Аудан басшысы алдымен «Ауыл – Ел бесігі» бағдарламасы аясында бой көтеріп жатқан спорт кешенінің құрылыс алаңында болды. Жауапты мамандар нысанның қазіргі жағдайы мен атқарылып жатқан жұмыстар туралы баяндады.

Бүгінде мердігер мекеме – «Намыс-Құрылыс» жауапкершілігі шектеулі серіктестігі ғимараттың негізгі құрылыс жұмыстарын толық аяқтаған. Қазіргі таңда ішкі әрлеу, сырлау жұмыстары жүргізіліп, ғимарат алдындағы тас төсеніштер мен кафель плиталарын төсеу жұмыстары атқарылуда. Сонымен қатар инженерлік желілер толық тартылып, нысанды пайдалануға беру үшін соңғы дайындық жұмыстары кезең-кезеңімен жүзеге асырылып жатыр.

Жоба құны 537,1 миллион теңгені құрайтын спорт кешені заманауи талаптарға сай жабдықталмақ. Мұнда спортпен шұғылдануға арналған арнайы залдар, жаттығу бөлмелері мен қажетті инфрақұрылым қарастырылған. Болашақта бұл кешен ауыл тұрғындарының бос уақытын тиімді өткізуіне, балалар мен жастардың спортқа қызығушылығын арттыруға үлкен мүмкіндік бермек.

Құрылыс нысанын аралау барысында аудан әкімі спорт нысандарының ауыл тұрғындары үшін маңыздылығына ерекше тоқталды.

– Спорт – ұлт денсаулығының кепілі. Сондықтан ауыл тұрғындарына, әсіресе жастарға қолайлы жағдай жасауымыз керек. Бұл спорт кешені ауыл жастарының бос уақытын тиімді өткізуіне, түрлі спорттық шаралардың ұйымдастырылуына мүмкіндік береді. Ең бастысы – құрылыс сапалы әрі уақытылы аяқталуы тиіс, – деді аудан басшысы.

Аудан әкімі мердігер мекеме өкілдеріне құрылыс сапасын қатаң бақылауда ұстауды, ішкі және сыртқы әрлеу жұмыстарын талапқа сай жүргізуді тапсырды. Сонымен қатар нысанды маусым айына дейін толық аяқтап, пайдалануға беру қажеттігін ескертті.

Бұдан кейін аудан басшысы «Қазалы – Қожабақы – Бозкөл – Кәукей» автожолының 32,1 шақырымындағы көпірді күрделі жөндеу жұмыстарының барысын көрді. Бұл жоба – ауыл тұрғындарының қауіпсіз әрі қолайлы қатынасын қамтамасыз ету бағытындағы маңызды инфрақұрылымдық бастамалардың бірі.

Жобаға сәйкес жаңа көпірдің ұзындығы 21,69 метрді құрайды. Ал жалпы өткел ұзындығы 375,13 метр болады. Қазіргі таңда мердігер мекеме – «Гүлнұр МК» ЖШС тарапынан құрылыс алаңына қажетті техникалар мен құрылыс материалдары толық жеткізілген.

Құрылыс жұмыстары аясында көпір жанына айналма жол салынып, уақытша су өткізгіш құбырлар орнатылған. Бұл көлік қозғалысының үздіксіз жүруін қамтамасыз ету үшін жасалған. Қазіргі уақытта құрылысшылар арматура тоқу жұмыстарын жүргізуде. Алдағы күндері жердің терең қабатына темірбетонды қада қағу жұмыстары басталмақ.

Жауапты мамандардың айтуынша, құрылыс барысында заманауи технологиялар қолданылып, көпірдің беріктігі мен ұзақ мерзімділігіне ерекше назар аударылуда. Жаңа көпір іске қосылғаннан кейін жол қозғалысының қауіпсіздігі артып, тұрғындардың қатынауына қолайлы жағдай жасалады.

Көпір құрылысының барысын бақылаған аудан әкімі бұл жобаның маңыздылығына тоқталып, жұмыстарды сапалы әрі белгіленген мерзімде аяқтау қажеттігін айтты.

– Көпір – жол инфрақұрылымының маңызды бөлігі. Сондықтан оның сапасы мен қауіпсіздігі басты назарда болуы керек. Бұл нысан ауыл тұрғындарының күнделікті өміріне тікелей әсер етеді. Құрылыс барысында ешқандай салғырттыққа жол берілмеуі тиіс, – деді аудан басшысы.

Сонымен қатар аудан әкімі мердігер мекеме өкілдеріне құрылыс алаңындағы қауіпсіздік талаптарын сақтауды, құрылыс материалдарының сапасын бақылауды және жұмысты қарқынды жүргізуді тапсырды. Көпір құрылысын қыркүйек айына дейін толық аяқтау қажеттігі ескертілді.

Аудан басшысы құрылыс нысандарын аралау барысында жауапты сала жетекшілеріне барлық жобалардың орындалу барысын тұрақты бақылауда ұстауды міндеттеді. Әрбір құрылыс нысаны тұрғындардың өмір сапасын жақсартуға бағытталғандықтан, жұмыстың сапасы мен мерзімі басты талап болуы керектігі айтылды.

– Мемлекет тарапынан бөлінген қаржының тиімді игерілуі, құрылыс сапасының талапқа сай болуы және нысандардың уақытылы тапсырылуы – басты міндеттердің бірі. Тұрғындар үшін маңызды әлеуметтік нысандар халық игілігіне сапалы қызмет етуі керек, – деді аудан әкімі.

Соңғы жылдары Қазалы ауданында ауылдық елді мекендердің инфрақұрылымын дамыту бағытында жүйелі жұмыстар жүргізілуде. Әсіресе «Ауыл – Ел бесігі» бағдарламасы аясында ауылдарда әлеуметтік нысандар салынып, жолдар жөнделіп, тұрғындардың өмір сүру сапасын арттыруға бағытталған жобалар жүзеге асырылуда.

Қожабақы ауылындағы спорт кешені мен көпір құрылысы – осы жұмыстардың нақты нәтижесінің бірі. Бұл жобалар ауыл тұрғындарының әлеуметтік жағдайын жақсартып қана қоймай, өңірдің инфрақұрылымдық әлеуетін арттыруға да оң әсерін тигізеді.

Жалпы, аудан басшысының Қожабақы ауылындағы құрылыс нысандарын аралауы барысында барлық жұмыстардың сапасы, мерзімі және тұрғындар үшін қолайлылығы басты назарға алынып, жауапты мекемелерге нақты міндеттер жүктелді. Алдағы уақытта да ауданда халықтың тұрмыс сапасын жақсартуға бағытталған ауқымды жобалар кезең-кезеңімен жалғасын таба бермек.