ҚЫЗЫЛОРДА ОБЛЫСЫНДА «БАҚЫТТЫ ОТБАСЫ» ФОРУМЫ ӨТТІ
15 мамыр – Халықаралық отбасы күніне орай Қызылорда облыстық білім басқармасының ұйымдастыруымен «PARENTS TALK: Бақытты отбасы» атты облыстық ата-аналар форумы өтті. Тағылымы мол шара отбасы құндылықтарын дәріптеуге, бала тәрбиесіндегі ата-ананың рөлін күшейтуге және қоғамдағы өзекті мәселелерді бірлесіп талқылауға арналды.
Форумға облыстағы білім беру ұйымдарының директорлары, педагог-психологтар, әлеуметтік педагогтер, ата-аналар комитеттерінің мүшелері, қоғамдық ұйым өкілдері, сала мамандары мен белсенді ата-аналар қатысты. Жиын барысында отбасы институтын нығайту, бала тәрбиесіндегі заманауи мәселелер, ата-аналарға психологиялық-педагогикалық қолдау көрсету және ата-ана мен бала арасындағы сенімді қарым-қатынасты дамыту мәселелері кеңінен талқыланды.
Ұйымдастырушылардың айтуынша, қазіргі қоғамда отбасының рөлі бұрынғыдан да маңызды бола түскен. Себебі баланың тұлға ретінде қалыптасуы ең алдымен отбасындағы тәрбие мен эмоционалдық ахуалға байланысты. Сондықтан форум аясында ата-аналардың психологиялық сауаттылығын арттыруға, балалармен тиімді байланыс орнатуға және отбасындағы өзара түсіністікті нығайтуға ерекше көңіл бөлінді.
Форум TEDx форматында ұйымдастырылып, қатысушыларға еркін пікір алмасуға және тәжірибе бөлісуге мүмкіндік жасалды. Шара барысында тәжірибелі психологтар, психиатр мамандар, қоғамдық қор жетекшілері мен ата-аналар өз тәжірибелерімен бөлісіп, өмірде кездесетін түрлі жағдайлар бойынша пайдалы кеңестер ұсынды.
Кездесуде жасөспірімдердің психологиялық саулығы басты тақырыптардың біріне айналды. Мамандар қазіргі таңда балалар мен жасөспірімдердің эмоционалдық жағдайына ерекше назар аудару қажеттігін айтты. Әсіресе әлеуметтік желілердің ықпалы, интернетке тәуелділік, кибербуллинг, отбасындағы қарым-қатынас мәселелері және жасөспірімдердің ішкі күйзелістері жан-жақты сөз болды. Психолог мамандар ата-аналарға балалардың көңіл күйіне бейжай қарамауға, олармен ашық сөйлесуге және сенімді байланыс орнатуға кеңес берді. Сонымен қатар бала тәрбиесінде жазалау мен қысымнан гөрі қолдау көрсету, түсіністік таныту және баланың пікірін тыңдай білу маңызды екені айтылды. Форум барысында қауіпсіз орта қалыптастыру мәселесіне де ерекше назар аударылды. Мамандар балалардың тек мектепте ғана емес, үйде де өзін қауіпсіз әрі еркін сезінуі өте маңызды екенін атап өтті. Отбасындағы тұрақты эмоционалдық қолдау баланың тұлғалық дамуына оң әсер ететіні айтылды.
Шарада ерекше балаларды тәрбиелеу тақырыбы да кеңінен қозғалды. Ата-аналар мен мамандар инклюзивті қоғам қалыптастырудың маңызын атап өтіп, ерекше білімді қажет ететін балаларды тәрбиелеудегі қиындықтар мен жетістіктер туралы пікір алмасты. Бұл бағытта ата-аналарға психологиялық қолдау көрсету, қоғамның түсіністігін арттыру және ерекше балалардың әлеуметтенуіне жағдай жасау мәселелері сөз болды.
Форум аясында жасөспірімдердің ата-аналарға арнаған бейнеүндеуі көрсетілді. Онда балалар ата-аналарынан түсіністік, қолдау және ашық қарым-қатынас күтетіндерін жеткізді. Бұл бейнеролик қатысушыларға ерекше әсер қалдырып, көптеген ата-аналарды ойландыра түсті.
Шара барысында шығармашылық көрмелер мен мәдени бағдарламалар ұйымдастырылды. Оқушылар мен жастардың қолөнер туындылары, сурет көрмелері мен шығармашылық жұмыстары көпшілік назарына ұсынылды. Сонымен қатар өнерпаз жастар ән шырқап, сахналық қойылымдар көрсетті. Бұл форумның мазмұнын байытып, қатысушыларға ерекше әсер сыйлады. Қатысушылардың пікірінше, мұндай кездесулер ата-аналардың бала тәрбиесіне деген көзқарасын өзгертіп, отбасы мүшелері арасындағы өзара түсіністікті нығайтуға ықпал етеді. Форум барысында айтылған кеңестер мен ұсыныстар көптеген ата-аналар үшін пайдалы тәжірибе болғаны айтылды. Педагог-психологтар бала тәрбиесінде мектеп пен ата-ананың бірлескен жұмысы аса маңызды екенін атап өтті. Себебі бала өмірінің басым бөлігі отбасы мен білім беру ұйымында өтеді. Сондықтан тәрбие процесінде екі жақтың өзара байланысы мен қолдауы қажет. Мамандар қазіргі кезеңде ата-аналардың психологиялық мәдениетін арттыру өзекті мәселе екенін жеткізді. Өйткені балаға дұрыс бағыт беру үшін ең алдымен ата-ананың өзі эмоционалдық тұрғыдан сауатты әрі сабырлы болуы қажет. Форум барысында күйзелісті басқару, отбасындағы жанжалдардың алдын алу, жасөспірімдермен сенімді диалог орнату секілді маңызды тақырыптар қозғалды. Шара соңында қатысушылар отбасы – қоғамның негізі екенін, ал бала тәрбиесі – тек ата-ананың ғана емес, тұтас қоғамның ортақ жауапкершілігі екенін атап өтті. Форум барысында көтерілген мәселелер мен айтылған ұсыныстар алдағы уақытта да жүйелі жұмыстар жүргізудің маңызын көрсетті. Ұйымдастырушылар мұндай тағылымды кездесулер алдағы уақытта да жалғасын табатынын жеткізді. Себебі отбасы құндылықтарын дәріптеу, ата-аналардың психологиялық-педагогикалық білімін арттыру және ұрпақ тәрбиесіндегі өзара қолдауды күшейту – қоғамның тұрақты дамуы үшін аса маңызды міндеттердің бірі.
«PARENTS TALK: Бақытты отбасы» форумы қатысушылар үшін мазмұнды әрі әсерлі алаңға айналып, отбасы тәрбиесіндегі өзекті мәселелерді талқылауға, тәжірибе алмасуға және рухани байланыс орнатуға мүмкіндік берді. Осындай игі бастамалар қоғамдағы отбасы институтының нығаюына, бала тәрбиесіне деген жауапкершіліктің артуына және келешек ұрпақтың саналы, тәрбиелі болып өсуіне оң ықпал етпек.
@Қызылорда облысы білім басқармасының баспасөз қызметі.
