ЖАЛАҒАШ АУДАНЫНЫҢ ӘКІМІ АҚСУ АУЫЛЫНЫҢ ТҰРҒЫНДАРЫМЕН КЕЗДЕСТІ
Аудан әкімі Ардақ Ибраимов жұмыс сапарымен Ақсу ауылдық округіне барып, елді мекеннің әлеуметтік-экономикалық даму ахуалымен танысты.
Сапар барысында аудан басшысы ауыл тұрғындарымен еркін форматта кездесу өткізіп, халықтың ұсыныс-пікірлері мен өтініштерін тыңдады. Кездесу ашық диалог алаңында өтіп, тұрғындар ауылдың өзекті мәселелері мен алдағы жоспарлары жөнінде пікір алмасты. Жұмыс сапары аясында аудан әкімі алдымен ауылдағы бірқатар инфрақұрылым нысандарын аралап көріп, атқарылып жатқан жұмыстардың барысымен танысты. Әсіресе, жол жөндеу, электр желілерін жаңарту, елді мекенді абаттандыру және тұрғындардың өмір сүру сапасын жақсартуға бағытталған жобалардың жүзеге асырылу барысына ерекше назар аударылды. Кездесу барысында аудан әкімі Мемлекет басшысының тапсырмаларына сәйкес, Үкіметтің қолдауымен және облыс әкімінің бастамасымен өңірде жүйелі жұмыстар атқарылып жатқанын атап өтті. Оның ішінде халықтың әл-ауқатын арттыру, ауылдық елді мекендердің инфрақұрылымын дамыту, тұрғындарды сапалы ауызсумен, көгілдір отынмен және тұрақты электр энергиясымен қамтамасыз ету бағытындағы жобалардың маңыздылығына тоқталды.
– Бүгінде Мемлекет басшысының тапсырмасына сәйкес ауылдық аумақтарды дамытуға ерекше көңіл бөлінуде. Халықтың тұрмыс сапасын арттыру, инфрақұрылымды жаңғырту, жолдарды жөндеу, инженерлік желілерді жаңарту бағытындағы жұмыстар кезең-кезеңімен жүзеге асырылып келеді. Бұл жұмыстар алдағы уақытта да жалғасын табады. Басты мақсат – ауыл тұрғындарына қолайлы әрі сапалы өмір сүру ортасын қалыптастыру, – деді аудан әкімі.
Кездесу барысында ауыл тұрғындары аудан көлемінде атқарылып жатқан жұмыстарға оң бағаларын беріп, өз ұсыныс-пікірлерін ортаға салды. Тұрғындар әсіресе ауыл көшелерін жөндеу, электр желілерін жаңарту, санитарлық тазалық, көгалдандыру және абаттандыру жұмыстарының қарқынды жүргізіліп жатқанын атап өтті. Сонымен қатар, тұрғындар тарапынан ауылішілік жолдардың сапасын жақсарту, көшелерді жарықтандыру, қоғамдық орындарды көбейту, жастарға арналған спорт және демалыс алаңдарын салу мәселелері көтерілді. Аудан басшысы әрбір ұсыныс назардан тыс қалмайтынын айтып, жауапты сала басшыларына нақты тапсырмалар жүктеді.
Айта кетейік, биыл Ақсу ауылындағы 3 көшеге күрделі жөндеу жұмыстары басталды. Атап айтқанда, М.Әуезов, Т.Қожақұлов және Ақбөгет көшелеріне толық асфальт төселетін болады. Қазіргі таңда жол жөндеу жұмыстарына қажетті дайындық шаралары жүргізіліп, тиісті мердігер мекемелер анықталған. Жалпы, аталған көшелердің жөнделуі ауыл тұрғындарының көптен бері көтеріп жүрген мәселелерінің бірі болатын. Жаңа асфальт жолдар ауылішілік қатынасты жеңілдетіп қана қоймай, тұрғындардың қауіпсіз әрі қолайлы қозғалысына мүмкіндік береді. Сонымен қатар, жол сапасының жақсаруы елді мекеннің санитарлық жағдайына да оң әсерін тигізеді. Бұдан бөлек, тағы 3 көшеге күрделі жөндеу жұмыстарын жүргізу бойынша жобалық-сметалық құжаттар әзірленіп, тиісті ұсыныстар берілді. Бұл бағыттағы жұмыстар кезең-кезеңімен жүзеге асырылып, ауыл инфрақұрылымын дамытуға серпін бермек.
Ал өткен жылы Беркінбай кәлпе – Жалағаш бағытындағы автожолға жаңғырту жұмыстары жүргізіліп, жол толық асфальтталды. Нәтижесінде аудан орталығы мен елді мекендер арасындағы көлік қатынасы едәуір жақсарып, тұрғындардың жүріп-тұруына қолайлы жағдай жасалды. Аталған жолдың жөнделуі ауыл шаруашылығы өнімдерін тасымалдауға да оң ықпалын тигізіп отыр. Қазіргі таңда Ақсу ауылының тұрғындары көгілдір отынның игілігін көруде. Бұл – ауыл тұрғындарының өмір сүру сапасын арттыру бағытындағы маңызды жобалардың бірі. Табиғи газдың келуі тұрғындардың тұрмыстық жағдайын жақсартып қана қоймай, экологиялық ахуалдың да оңалуына ықпал етуде. Сонымен қатар, ауылдағы электр желілерін жаңарту жұмыстары да кезең-кезеңімен жүзеге асырылуда. Ескірген электр бағаналары мен желілері ауыстырылып, қуат көздерінің тұрақтылығын қамтамасыз ету бағытында нақты шаралар қолға алынған. Бұл жұмыстар электр энергиясының сапасын арттырып, апатты жағдайлардың алдын алуға мүмкіндік береді. Ауыл инфрақұрылымын жақсарту бағытындағы жұмыстар тек жол және инженерлік желілермен шектелмейді. Қазіргі таңда ауылды абаттандыру, көгалдандыру, санитарлық тазалықты сақтау бағытындағы жұмыстар да жүйелі түрде жүргізілуде. Көшелер тазартылып, қоғамдық орындар ретке келтірілуде. Сонымен қатар, ағаш көшеттерін отырғызу және жасыл аймақтарды көбейту мәселесіне де ерекше көңіл бөлінуде.
Аудан басшысы кездесу барысында ауыл тұрғындарының бірлігі мен белсенділігі елді мекеннің дамуына үлкен үлес қосатынын атап өтті. Туған жердің көркеюіне әрбір азамат жауапкершілікпен қарауы қажет екенін айтып, тұрғындарды ортақ іске белсенді атсалысуға шақырды. Жұмыс сапары қорытындысында аудан әкімі жауапты сала басшыларына ауыл тұрғындары тарапынан көтерілген мәселелер бойынша нақты тапсырмалар беріп, олардың кезең-кезеңімен шешілуін бақылауға алатынын жеткізді.
Жалпы, Ақсу ауылдық округінде жүзеге асырылып жатқан инфрақұрылымдық және әлеуметтік жобалар тұрғындардың өмір сүру сапасын арттыруға бағытталған. Алдағы уақытта да ауылды дамыту, тұрғындарға қолайлы жағдай жасау және елді мекеннің әлеуметтік-экономикалық әлеуетін арттыру бағытындағы жұмыстар жүйелі түрде жалғасын табатын болады.
Жалағаш ауданы әкімінің баспасөз қызметі.
