ҚАЗАЛЫДА КОНГО-ҚЫРЫМ ГЕМОРРАГИЯЛЫҚ ҚЫЗБАСЫНЫҢ АЛДЫН АЛУ МӘСЕЛЕСІ ТАЛҚЫЛАНДЫ

Бүгін, 11:30

1 507

Қазалы ауданында аудан әкімі Алмасбек Есмахановтың төрағалығымен Конго-Қырым геморрагиялық қызбасының алдын алу және кенеге қарсы залалсыздандыру жұмыстарын ұйымдастыру мәселелеріне арналған кеңейтілген мәжіліс өтті. Жиынға аудан әкімдігінің жауапты бөлім басшылары, ауылдық округ әкімдері, ветеринариялық қызмет өкілдері, санитарлық-эпидемиологиялық сала мамандары және тиісті мекеме жетекшілері қатысты.

Күн тәртібінде аса қауіпті жұқпалы аурудың алдын алу, табиғи ошақ аймақтарында эпидемиологиялық қауіпсіздікті қамтамасыз ету, мал шаруашылығы нысандарын залалсыздандыру жұмыстарын күшейту, сондай-ақ тұрғындар арасында түсіндіру және ақпараттық-түсіндіру жұмыстарын жүргізу мәселелері қаралды.

Қазіргі таңда Қазалы ауданы аумағында Мәдениет, Басықара, Жанқожа батыр, Байғожа стансасы, №99 бекет, Ойынды және Алтай бекеті сынды 7 елді мекен Конго-Қырым геморрагиялық қызбасының табиғи ошақ аймағы ретінде белгіленген. Бұл аумақтарда кенелердің таралу қаупі жоғары болғандықтан, эпидемиологиялық бақылау ерекше режимде жүргізілуде.

Осыған байланысты аудан көлемінде кешенді іс-шаралар жоспары бекітіліп, залалсыздандыру жұмыстары кезең-кезеңімен ұйымдастырылуда. Бірінші кезең 27 сәуір мен 5 мамыр аралығында жүзеге асырылса, екінші кезең 6–12 мамыр күндері аралығында жүргізілді. Аталған кезеңдерде ауылдық елді мекендердегі мал қоралары, тұрғын үйлердің аулалары, мал ұстайтын орындар мен қоғамдық аумақтар залалсыздандырудан өткізілді.

Мамандардың айтуынша, жүргізілген жұмыстардың тиімділігі үшін залалсыздандыру шараларын тек бір реттік емес, маусымдық және жүйелі түрде атқару қажет. Себебі кенелердің биологиялық белсенділігі ауа райының жылынуымен қатар күшейіп, ауыл шаруашылығы саласында қауіп деңгейін арттырады.

Жиында аудан аумағында тіркелген эпидемиологиялық жағдай да кеңінен қаралды. Атап айтқанда, осы жылдың 16 маусым күні Ү.Түктібаев ауылы мен Әйтеке би кентінде Конго-Қырым геморрагиялық қызбасының болжамды жағдайлары тіркелгені айтылды. Бұл жағдайлар бойынша тиісті санитарлық-эпидемиологиялық тексерулер жүргізіліп, ошақтарда шұғыл дезинфекциялық шаралар қолға алынған.

Аталған жағдайға байланысты маусым айында төтенше жағдайлардың алдын алу және оларды жою жөніндегі комиссияның екі отырысы өткізіліп, салалық мекемелерге нақты хаттамалық тапсырмалар берілді. Комиссия шешімдеріне сәйкес, эпидемиологиялық қауіптің таралуын болдырмау мақсатында жедел іс-шаралар жоспары әзірленді.

Соның негізінде 19 маусымнан бастап «Ala Komford» ЖШС тарапынан Ү.Түктібаев ауылында залалсыздандыру жұмыстары басталып, қазіргі уақытта жүйелі түрде жалғасуда. Мамандар тұрғын үйлердің ауласын, мал қораларын, қора маңын, қоқыс жиналатын орындарды және мал басы жиі шоғырланатын аумақтарды толық өңдеуден өткізуде.

Сонымен қатар, аудандық ветеринариялық станция мен санитарлық қызмет өкілдері бірлесіп, Көларық, Майдакөл, Ақжона және Аранды ауылдық округтеріндегі мал қораларын залалсыздандыру жұмыстарына қаржы бөлініп, жоспарлы іс-шаралар бекітілді. Бұл жұмыстардың негізгі мақсаты – аурудың таралу тізбегін үзіп, эпидемиологиялық тұрақтылықты қамтамасыз ету.

Қазіргі таңда Ақтан батыр, Бекарыстан би, Майдакөл, Аранды және Қожабақы ауылдарында мал қораларын механикалық тазалау жұмыстары жүргізілуде. Бұл кезеңде қора ішін көң-қоқыстан тазарту, ескі төсеніштерді шығару, мал тұратын орындарды санитарлық талапқа сәйкестендіру шаралары атқарылуда.

Мамандардың айтуынша, механикалық тазалау – залалсыздандырудың ең маңызды кезеңдерінің бірі болып табылады. Себебі органикалық қалдықтар толық жойылмайынша, химиялық өңдеудің тиімділігі төмендейді. Сондықтан әр ауылдық округте бұл жұмыс қатаң бақылауға алынған.

Ағымдағы жылдың 21 маусымынан бастап Ақтан батыр ауылынан бастау алатын залалсыздандырудың келесі кезеңі қолға алынбақ. Бұл кезеңде барлық елді мекендер толық қамтылып, жеке аулалар мен мал шаруашылығы нысандары түгелдей өңдеуден өтеді.

Мәжіліс барысында аудан әкімі Алмасбек Есмаханов санитарлық-эпидемиологиялық қауіпсіздікті қамтамасыз етудің маңыздылығына тоқталды. Ол әсіресе жаз мезгілінде қауіптің артуына байланысты алдын алу шараларын күшейту қажеттігін атап өтті.

– Елді мекендердегі санитарлық тазалық – ең алдымен тұрғындардың денсаулығы үшін маңызды. Мал қоралары мен аулалардың жүйелі түрде тазалануы, залалсыздандыру жұмыстарының сапалы жүргізілуі, кенеге қарсы шаралардың уақытылы орындалуы – басты талап. Бұл бағыттағы жұмыстар бір реттік емес, тұрақты бақылауда болуы тиіс, – деді аудан әкімі.

Сонымен қатар аудан басшысы тұрғындар арасында түсіндіру жұмыстарын күшейтуді тапсырды. Аурудың алдын алуда ақпараттық жұмыстардың рөлі ерекше екені айтылып, ауыл тұрғындарына арналған жаднамалар тарату, кездесулер өткізу және бұқаралық ақпарат құралдары арқылы кеңінен насихат жүргізу қажеттігі ескертілді.

Мамандардың айтуынша, Конго-Қырым геморрагиялық қызбасы – аса қауіпті жұқпалы аурулардың бірі. Сондықтан оның алдын алу үшін жеке гигиена талаптарын сақтау, малмен жұмыс кезінде сақтық шараларын орындау, кенеге қарсы қорғану құралдарын қолдану маңызды.

Жиын барысында ветеринариялық және санитарлық қызмет өкілдері аудан аумағында жүргізіліп жатқан жұмыстардың барысы туралы баяндап, алдағы кезеңге арналған жоспарлармен таныстырды. Олардың мәліметінше, дәрілік препараттар қоры жеткілікті, қажетті техника мен мамандар жұмылдырылған.

Мәжіліс қорытындысында аудан әкімі барлық жауапты сала басшыларына нақты тапсырмалар берді. Атап айтқанда, залалсыздандыру жұмыстарының сапасын арттыру, дәрілік қорды толықтыру, ауылдық округтерде бақылауды күшейту және барлық іс-шаралардың белгіленген кестеге сәйкес орындалуын қатаң қадағалау міндеттелді.

Сондай-ақ әрбір ауылдық округ әкімдігіне тұрғындармен тығыз байланыста жұмыс істеу, қауіптің алдын алу шараларын түсіндіру және санитарлық талаптардың сақталуын бақылау жүктелді.

Жиын соңында аудан әкімі аталған бағыттағы жұмыстарды өзінің жеке бақылауында ұстайтынын атап өтіп, эпидемиологиялық қауіпсіздікті қамтамасыз ету – аудан әкімдігінің басты міндеттерінің бірі екенін жеткізді.

Қазалы ауданында Конго-Қырым геморрагиялық қызбасының алдын алу жұмыстары алдағы уақытта да жүйелі түрде жалғасып, барлық елді мекендер толық қамтылатын болады. Бұл шаралар тұрғындардың денсаулығын қорғауға және өңірдегі санитарлық тұрақтылықты сақтауға бағытталған.

@Қазалы ауданы әкімінің баспасөз қызметі