Шиеліде мектеп оқушысы ер адамға пышақпен шабуыл жасаған

Қызылорда облысының Шиелі ауданында кәмелетке толмаған жасөспірім жергілікті тұрғынға пышақпен шабуыл жасады деген күдікке ілінген,- деп хабарлайды Оpennews.kz ақпарат агенттігі Ulysmedia.kz сайтына сілтеме жасап.

Оқиға салдарынан жарақат алған ер адам полицияға жүгінген. Қазіргі таңда күдікті ұсталып, соттың шешімімен оған үйқамақ түріндегі бұлтартпас шарасы қолданылды.

Полиция бұл факті бойынша «Бұзақылық» бабы бойынша қылмыстық іс қозғалғанын хабарлады. Тергеу барысында оқиғаның барлық мән-жайы анықталуда.

Сонымен қатар жасөспірімнің заңды өкілдерін бала тәрбиесі бойынша міндеттерін тиісінше орындамағаны үшін жауапкершілікке тарту жоспарланып отыр. Материалдар кәмелетке толмағандардың істері жөніндегі комиссияға да жолданған.

Комиссия жасөспірімнің әрекетіне себеп болуы мүмкін жағдайларды қарап, қосымша шаралар қабылдау мәселесін шешеді.

Қылмыстық іс бойынша тергеу жалғасып жатыр және облыстық полиция департаменті басшылығының бақылауында.