Вьетнамдық журналистер Димаш Құдайберген туралы жарыса жазуда

4 қараша 2025, 11:26

2 551

6 желтоқсанда Вьетнамның астанасы Ханой қаласында өтетін ең ірі 8WONDER Winter 2025 фестиваліне қазақстандық әнші Димаш Құдайбергеннің қатысатыны туралы жаңалық шетелдік басылымдарда кеңінен талқыланып жатыр, - деп хабарлайды "Opennews.kz" ақпарат агенттігі.

Вьетнамның жетекші ақпарат құралдары Димаштың шығармашылығына ерекше назар аударып, оның талантын түрлі қырынан сараптаған.

Saigon Giai Phong: «Димаштың дауысы – шексіз кеңістік»

Елдің беделді басылымдарының бірі Saigon Giai Phong алдымен фестиваль туралы хабарлап, кейін қазақстандық өнер иесінің даралығына тоқталады.

Газет журналистері Димаштың дауыс мүмкіндігіне тәнті болып, оны адам мүмкіндігінен де жоғары деңгейге көтереді:

«Димаш Құдайберген – Қазақстаннан шыққан әлемге әйгілі әнші. Ол алты октава мен бес жарты тонды қамтитын ерекше дауыс диапазонымен ерекшеленеді. Оның орындауында терең баритоннан бастап, физикалық шектеулерге бағынбайтындай жоғары ноталарға дейінгі кең ауқым бар. Миллиондаған жанкүйер оны тек вокалдық шеберлігі үшін ғана емес, сондай-ақ музыка арқылы мәдени және тілдік шекараларды бұзып, адамдардың жүрегіне жол таба білетіні үшін сүйеді», – деп жазады басылым.

Tuoi Tre: «Димаш – сирек кездесетін жаһұт»

Ал Вьетнамның күн сайын шығатын тағы бір ірі газеті Tuoi Tre Димашты «сирек кездесетін жаһұт» деп атап, оның көпқырлы таланты мен шығармашылық еркіндігін ерекше бағалайды.

«Димаш – нағыз жаһұт. Ол талантты ғана емес, қоғамдағы жалпы ағымға ермейтін сирек өнерпаз. Музыкада алгоритм мен формула үстемдік еткен заманда ол өз жолын тапты. Классикалық, поп, фолк және опера жанрларын үйлестіре отырып, 13-тен астам тілде ән орындайды – ағылшын, орыс, француз, қытай, араб және қазақ тілдерін қоса алғанда. Бұл оның әрбір халық мәдениетіне деген құрметін білдіреді», – дейді газет.

Басылым сонымен қатар Димаштың шығармашылық ұстанымын жоғары қоятынын атап өтеді:

«Ол өнер еркіндігін сақтау үшін ірі дыбыс жазу компанияларымен ұзақмерзімді келісімшартқа отырмайды. Димашқа жарнама қажет емес – оған тек шынайы жүрек пен мінсіз шеберлік жеткілікті».

VnExpress: «Аспанмен астасқан дауыс»

Вьетнамның ең танымал жаңалықтар порталы VnExpress те қазақстандық әнші туралы арнайы мақала жариялап, оны «аспанмен астасқан дауыс иесі» деп сипаттайды. Материалда Astana Times газетінде жарық көрген сараптамадан үзінді келтірілген:

«Жас болса да, Димаш Құдайбергеннің музыкасы тыңдарманнан ерекше зейін мен ықылас талап етеді. Оның кейбір шығармалары соғыс, аштық және табиғи апат секілді заманауи адамзат мәселелеріне арналған», – деп жазады автор.