Димаш Құдайбергеннің шығармашылығын қамтитын кітап жарық көрді
Белгілі әнші Димаш Құдайбергеннің шығармашылығын жан-жақты таныстыратын жаңа кітап-альбом жарық көрді. Жобаны “Алматы кітап баспасы” DimashAli продюсерлік орталығының қолдауымен көпшілікке ұсынды,-деп хабарлайды Opennews.kz ақпарат агенттігі.
“Димаш Құдайберген: Шексіз музыка” атты басылым 289 беттен тұрады және орындаушының кәсіби қалыптасу кезеңдерін толық қамтиды. Кітапқа архивтік суреттер, халықаралық концерттерден алынған ерекше кадрлар, бұрын жарияланбаған материалдар және Димаштың жеке естеліктері енгізілген.
Сондай-ақ кітапта музыканттың балалық шағы, өнер жолындағы алғашқы қадамдары, әлемдік деңгейдегі танымалдылығы, әйгілі концерттік алаңдардағы өнер көрсетуі, халықаралық жобаларға қатысуы, фанаттармен байланысы және сахна сыртындағы шығармашылық үдеріс егжей-тегжейлі баяндалады.
Басылым қазақ, орыс және ағылшын тілдерінде дайындалып, әлемнің түкпір-түкпіріндегі оқырмандарға қолжетімді. Кітап қазақстандық мәдениетті насихаттау мен Димаш Құдайбергеннің шығармашылығын кеңінен танымал етуге бағытталған.
