Жетісуда жүргізуші екі адамды қағып, оқиға орнынан қашып кетті

Жетісу облысында жүргізуші екі адамды қағып, оқиға орнынан қашып кетті, - деп хабарлайды Opennews.kz ақпарат агенттігі.

Жаркент полицейлері адам өліміне әкеліп соқтырған жол-көлік оқиғасынан қашып кеткен 31 жастағы Toyota Camry 10 жүргізушісін анықтап, ұстады. Бұған дейін бұзақылық жасағаны үшін жауапқа тартылған азамат қазір полиция бөліміне жеткізіліп, уақытша ұстау изоляторына қамауға алынды.

10 қараша күні Жаркент қаласындағы Әлиев көшесінде белгісіз көлік екі жаяу жүргіншіні қағып кетті. Өкінішке қарай жол-көлік оқиғасы салдарынан 28 жастағы ер адам оқиға орнында көз жұмды. Көлік жүргізуші қашып кеткен.

«Қатты соққыдан оқиға орнында автокөліктің мемлекеттік нөмірі түсіп қалды. Сол арқылы оқиға орнынан қашқан жүргізушіні анықтау мүмкін болды. Жаяу жүргіншілерді көршілес Алматы облысының 31 жастағы тұрғыны қағып кеткендігі анықталды. Көлік тәркіленіп, арнайы тұраққа қойылды», – деді Панфилов ауданының полиция бөлімі.

Жол апатынан аман қалған 34 жастағы ер адам дәрігерлердің бақылауында. Тергеу қылмыстық заңнаманың екі бабы бойынша жүргізіліп жатыр.