Белгісіз ер адам әйелдің басы салынған пакетті базарға тастап кеткен
Алматыдағы базарлардың бірінен әйелдің басы кесілген қалта табылды, - деп хабарлайды "Opennews.kz" ақпарат агенттігі.
Желіде қапта оралған адамның кесілген басы табылғаны туралы ақпарат тарап көпшіліктің жағасын ұстатты. Полиция департаменті бұл ақпаратты растады.
Ведомство мәліметінше 12 сәуір күні сағат 08:42-де 102 пультіне Шолохов көшесіндегі қараусыз қалған ғимараттың жанынан әйелдің мәйіті табылған. Тергеу-жедел тобы оқиға орнын тексеріп дененің табылғанын растады. Алайда мәйіттің басы кесілген болып шықты. Біраз уақыттан кейін сол маңдағы сауда орындарының бірінен әйелдің басы табылды.
“Оның жеке басы анықталды: 47 жастағы азаматша, тұрақты тұрғылықты жері жоқ, бұрын есірткі қылмысы үшін бірнеше рет сотталған. Қазіргі уақытта аталған дерек бойынша Түрксіб аудандық полиция басқармасымен ҚР ҚК-нің 99-бабы бойынша қылмыстық іс тіркелді. Қылмысты ашуға және оның мән-жайын анықтауға бағытталған жедел іс-шаралар кешені жүргізілуде.
ҚР ҚПК-нің 201-бабы және ҚР Конституциясының талаптарына сәйкес қылмыстық істің өзге де мәліметтері жария етуге жатпайды”, - делінген хабарламада.
