Қызылорда облысында әкесінің көлігін айдап кеткен жасөспірім жол апатына ұшырады
Қызылорда облысы Шиелі ауданында 11 сынып оқушысы әкесінің көлігін жүргізіп, жол апатына түсті, - деп хабарлайды "Opennews.kz" ақпарат агенттігі.
Оқиға 4 мамыр күні сағат 02.45 шамасында болған. Қызылорда облысының Шиелі кентінде тұратын 17 жастағы жасөспірім "Тойота" маркалы автокөлігінің басқару жүйесіне ие бола алмай жол-көлік оқиғасын жасаған.
"Жол апаты салдарынан 1 жолаушы қөз жұмып, қалған үшеуі (жүргізушімен қоса) жарақат алды. Бұл дерек бойынша ҚР Қылмыстық кодексінің 345-бабының 3-бөлігімен сотқа дейінгі тергеп-тексеру әрекеттері жүргізілуде. Онда автомобильдi басқаратын адамның жол жүрісі қағидаларын бұзып, оның соңы абайсызда адам өліміне әкеп соққаны көрсетілген. Тиісті сот сараптамалары тағайындалды", - деп мәлім етті Қызылорда облыстық полиция департаментінен.
Бұл жөнінде Шиелі аудандық білім бөлімінің басшысы Жібек Баймұратова түсініктеме берді.
"Кәмелетке толмаған балалар көлікті рұқсатсыз үйден түн мезгілінде айдап шығып, жол апатына ұшыраған. Жарақат алған балалар ем алуда. Жағдайлары бірқалыпты", - деді бөлім басшысы.
