Қаз
Рус
42 млн теңгені жымқырған диспансердің есепшісі 1,5 жылдан кейін ұсталды
Көкшетауда 42 млн теңгені ұрлаған туберкулезге қарсы диспансердің есепшісі 1,5 жылдан кейін ұсталды, - деп хабарлайды "Opennews.kz" ақпарат агенттігі.
Ведомствоның мәліметінше, күдікті 2020 жылдың желтоқсаны мен 2021 жылдың шілдесі аралығында Ақмола облыстық туберкулезге қарсы диспансерінде есепші болып жұмыс істеген. Ол біреудің электрондық-цифрлық қолтаңбасын заңсыз пайдалану арқылы есеп айырысу шотынан шамамен 42 млн теңге сомасында ақшаны шешіп алып, кейін ізін суытқан.
«2021 жылдың шілдесінде Көкшетау қалалық полиция басқармасы Қылмыстық кодекстің 188-бабы 4-бөлігі 3-бөлімшесі (аса ірі мөлшерде ұрлық) бойынша сотқа дейінгі тергеп-тексеруді бастады. Іздестіру шаралары барысында күдікті биылғы жылдың 24 сәуірінде Павлодар қаласында ұсталып, уақытша ұстау оқшаулағышына қамалды. Күдікті қылмысын толық мойындады және маусымның 15-де Көкшетау қаласының прокуратурасы айыптау актісі бойынша қылмыстық іс материалдарын соттың қарауына жіберді», - деді ведомстводан.
Прокуратураның баспасөз қызметінен атап өткендей, Қазақстан Республикасы Қылмыстық кодексінің аталмыш бабы бойынша күдіктінің мүлкі тәркіленіп, бес жылдан он жылға дейінгі мерзімге бас бостандығынан айыру жазасы қарастырылған.
