Қала тұрғындарын қорқытқан «елес» қызға 69 мың теңге айыппұл салынды

Семейде «елестің» костюмін киіп, қала тұрғындарын қорқытқан 22 жастағы қыз ұсталды, - деп хабарлайды "Opennews.kz" ақпарат агенттігі Қалалық полиция департаментінің баспасөз қызметіне сілтеме жасап. 

ПД-ның мәліметінше, оқиға жексенбі күні кешке қаладағы жерасты өткелдерінің бірінде болған. 22 жастағы қыз «елестің» костюмін киіп, қала тұрғындарын қорқытқан.

Полицейлер қоғамдық орында қала тұрғындарының тыныштығын бұзып, сырт келбетімен өтіп бара жатқандарды шошытып жүрген тұрғынды анықтады.

Сот шешімімен қыз кінәлі деп танылып, 69 мың теңге айыппұл түріндегі әкімшілік жауапкершілікке тартылды.

Семей қаласы полиция басқармасы облыс орталығының тұрғындары мен қонақтарын қоғамдық орындарда тәртіп ережелерін сақтап, қала тұрғындарының тыныштығын бұзбауды сұрайды.