Қызылордада 37 жастағы азамат ірі компаниядан 33 млн теңге жымқырған
Қызылордалық полицейлер ірі компаниядан 33 млн теңгеге жуық ақшаны алаяқтық жолмен заңсыз иеленген азаматты ұстады,- деп хабарлайды "Opennews.kz" ақпарат агенттігі.
Облыстық ПД криминалдық полиция басқармасының қызметкерлері «Құқықтық тәртіп» жедел алдын алу шарасы барысында іздеуде жүрген 37 жастағы қызылордалықты Атырау қаласынан қолға түсірді.
Оған қатысты Қылмыстық кодекстің 190-бабы 4-бөлігі («Аса ірі мөлшерде жасалған алаяқтық») бойынша тергеу жүргізіліп жатыр. Ол биыл шілде айында алаяқтық жолмен ірі компаниядан 33 миллион теңгеге жуық ақшаны заңсыз иемденген, - деп мәлімдеді Қызылорда облыстық ПД баспасөз қызметі.
Атырау қаласында ұсталған күдіктіге қатысты қамауда ұстау түріндегі бұлтартпау шарасы санкцияланған. Қазір ол уақытша ұстау изоляторында жатыр.
