Әйел күйеуін өлтірді деген күдікпен қамауға алынды
Түркістан облысы Сайрам ауданы Қарамұрт ауылында 49 жастағы әйел 30 жыл отасқан күйеуін өлтірді деген күдікпен қамауға алынды, - деп хабарлайды "Opennews.kz" ақпарат агенттігі.
Оқиға 12 сәуір күні орын алған. Марқұмның інісінің айтуынша, әйел жолдасын қылқындырып өлтірген.
Сайрам аудандық соты «Адам өлтіру» бабымен іс қозғап, күдіктіні 2 айға қамауға санкция берді.
Күдікті мен марқұмның кәмелет жасқа толған ортақ 4 баласы бар. Олардың үлкені әкесі ішімдік ішіп, анасын көп ұратынын, талай рет үйден қашып, далада қонғанын айтты.
Ауылдық учаскелік полицейі марқұмның ішімдік ішкенін, отбасылық жанжал мен тұрмыстық зорлық-зомбылықтан күдікті 2019 жылы «полиция қамқорлығына алынғанын» айтады.
Дегенмен 2023 жылдан бері әйелі күйеуінің үстінен бір де бір рет шағым түсірмеген.
