Әйелін қылқындырып өлтірген полицей сотталды
Әйелін ұзартқышпен қылқындырып өлтірген 25 жастағы бұрынғы полицейге қатысты сот үкімі шықты, деп хабарлайды "Opennews.kz" ақпарат агенттігі.
Жасұлан Төлегенов бұрын полицей, аға лейтенант болып жұмыс істеген. 2023 жылы 19 қазанда әріптесімен бірге жүріп жүрген қызымен ұрысып қалып, көпірден секіргелі тұрған жас жігітті аман алып қалған.
Арада екі апта өткен соң, 31 қазанда Жасұлан өз әйелін қылқындырып өлтірген. Оның әйелі де ішкі істер органында жұмыс істеген. Екеуінің көңілі жараспай, ақыры ажырасу туралы шешім қабылдаған.
Екеуінің арасында ұрыс шығып, кейін жанжалға ұласқан. Эмоциясын бақылай алмаған еркек әйелін электр ұзартқышпен қылқындырған. Салдарынан әйел сол жерде көз жұмған. Кейін ол қылмыстың ізін жасырып, әйелі өз-өзіне қол жұмсады дегенге келтіріп, оның денесін гаражға апарып, мойнына жіп салған.
Бұрынғы инспектор 9 жылға бас бостандығынан айырылды.
