ҚЫЗЫЛОРДАДА ДӘРІГЕР ҚАТЕЛІГІ: ГИНЕКОЛОГИЯЛЫҚ ОТА КЕЗІНДЕ ТОҚ ІШЕКТІ КЕСКЕН

6 тамыз 2024, 17:54

4 264

Соңғы үш жылда Қазақстанда дәрігерлік қателік бойынша мыңнан астам қылмыстық іс қозғалған, - деп хабарлайды «Opennews.kz» ақпарат агенттігі.

Дәрігерлердің салғырттығынан жапа шеккендер мен қаза болғандар саны күн санап артып келеді. Бұрындары жыл сайын тіркелетін мұндай оқиғалар бүгінде ай сайын қайталанып, науқастардың мұң-зарын еститін болдық. Қызылорда облыстық Ана мен бала перинаталдық орталығында орын алған соңғы жағдай Сыр жұртшылығын дүр сілкіндірді. Гинекологиялық ота кезінде дәрігердің науқастың тоқ ішегін кесіп алуы әлеуметтік желілерде қызу талқылануда.

Денсаулық сақтау министірлігі қателескен дәрігерді неге кешіруге дайын? Жаңа заң дәрігерлерді қылмыстық жауапкершіліктен босатуға бейімделген бе? Адам ауруына шипа беруді таңдаған дәрігерлер бүгінде теория мен практиканы ұштастыра ма?

Адам денсаулығына бейжай қараудың кесірінен талай отбасы зардап шегуде. Мәселен, Қызылорда облысында 2020 жылы 12 жағдай, 2021 жылы 10 жағдай болса, 2022 жылы 5 ана өлімі тіркелген. Ана мен баланың өлімін Сыр халқы әлі ұмыта қойған жоқ. Бұл деректер дәрігерлік қателіктердің тек бір бөлігі ғана.

"Жақында Ана мен бала перинаталдық орталығында емделмек болған келіншектің жан түршігерлік оқиғасы жарияланды. «Ана мен бала орталығында 10.06.2024 жылы жатыр түтікшесінің тұқылын алу үшін ота жасатқан болатынмын. Ота барысында дәрігер тоқ ішегімді кесіп алған, тіпті біз білмедік те. Маған ешкім қараған жоқ. Менің жағдайым нашарлап, тыныс алуым қиындады. Содан тағы да ота жасалды. Жағдайым қиындап, 8 күн жансақтау бөлімінде жаттым. Сепсис, абсцесс, өкпеге су жиналу секілді асқынулар болды. 6 ай еңбекке жарамсыз болдым", - деп жазады автор Аружан Марат.

Ана мен бала орталығының мамандары: «Өтінішіңізді Облыстық перинаталдық орталығы әкімшілігі назарына алды. Аталған мәселе бойынша Ана мен бала орталығында талдау жасалып, түзету іс-шаралары қабылданып, дәрігерге орталық басшысының бұйрығымен әкімшілік шара қолданылды», - деп жауап берді.

Дәрігер – адам жанының арашасы. Бұл аксиоманы дәлелдеудің қажеті жоқ. Бірақ, басы ауырып, балтыры сыздағанның барлығы бірден ауруханаға бармайды. Дерті әбден асқынғанда ғана ем іздейтіндер бар. Осы уақытқа дейінгі фактілер дәрігерлердің науқастардың дертін дер кезінде анықтай алмай, талай жанды сандалтқанын көрсетеді.

«2019 жылы Ана мен балада босанып болған соң дәрігер қателігінің кесірінен менің де тоқ ішегіммен қынабымды бірге тігіп жіберген. Бір жыл бойы солай жүріп, 2020 жылы қайта ота жасаттым. Облыстық денсаулық басқармасы да, Денсаулық сақтау министрлігі де ештеңе шешпейді екен. Сөгіс беріп қоя салды», - дейді Нұргүл Орынбаева.

Дәрігерлердің қателігі жай ғана техникалық ақау емес, әрбір адамның тағдырына жазылмас жара салатын үлкен қылмыс. Дүмше дәрігерлердің әрекеттері өмірлерді құртумен қатар, қоғамның дәрігерлік қызметке деген сенімін де шайқалтты. Әрбір дәрігер өз ісіне жауапкершілікпен қарап, адам өмірінің құндылығын түсінуі тиіс. "Гиппократ антын" оқумен шектелмей, оны күнделікті қызметінде бұлжытпай орындау керек. Жұртшылықтың ашу-ызасына себеп болған дәрігерлер өз саласында орынсыз қателіктерге жол бермеуді үйренбесе, денсаулық сақтау саласында үлкен өзгерістер қажет болады.