Қажырлы еңбекке – лайықты марапат

29 қазан 2024, 10:06

1 223

Өнер орталығында облыс әкімі Нұрлыбек Нәлібаевтың қатысуымен өткен салтанатты іс-шарада Алмагүл Бақтиярованы «Құрмет» орденімен марапатталып, зор құрметке бөленді, - деп хабарлайды "Opennews.kz" ақпарат агенттігі.

Мемлекеттік награданы ардақты ардагерге облыс әкімі табыс етті.

Осы орайда Сырдария аудан әкімі Берік Сәрменбаев еңбегін елге арнаған ардақты жанды құттықтап, шаңырағына арнайы сәлем бере барды. «AMANAT» партиясының «Ардагерлерді ардақтайық» жобасы аясындағы игі іс-шараға аудандық мәслихат төрағасы Ержан Әжікенов, облыстық мәслихат депутаты Жұмабек Ембергенов, «AMANAT» партиясы аудандық филиалының Атқарушы хатшысы Ақтөре Ибрагимұлы қатысты. Аудан басшысы бастаған азаматтар еңбек ардагерін Республика күні мерекесімен құттықтап, зор денсаулық, мол бақыт тіледі. Сондай-ақ облыстың, ауданның қоғамдық-саяси, рухани-мәдени дамуына қосқан үлесін жоғары бағалап, мемлекеттік наградамен марапатталуымен құттықтады.

Халқымызда «Өткенге – құрмет, бүгінге – өнеге» деген қанатты сөз бар. Осы айтылғандай, әр халықтың, әр елдің, әр жердің атын шығаратын тұлғалар болады. Бақтиярова Алмагүл Сайранқызы да – сондай жарқын тұлғалардың бірі. Сіз қандай салада болсын ел игілігі үшін жан аямай жұмыс істедіңіз. Халқымызда «Бидайдың басын көтергені – дәнінің жоқтығы, басшының кеудесін көтергені – ақылының жоқтығы» деген сөз бар. Қашан көрсең де сабырлы қалпынан таймаған Сіздің қарапайым да кішіпейіл мінезіңіз көпке үлгі. Алмагүл анамызды қалай мақтасақ та негіз бар. Қоғам мен отбасын қатар алып жүрген ер мінезді абзал жанның «Құрмет» орденімен наградталуы нағыз иесін тапқан лайықты марапат деп айта аламыз. Өзіңізге зор денсаулық, мол бақыт, амандық-саулық тілейміз, – деді аудан әкімі.

Өз кезегінде Алмагүл Сайранқызы құрмет көрсеткен азаматтарға алғысын білдіріп, ақ батасын берді.

«Қарттарын қадірлеген ел ардақты» деген. Арнайы сәлем беріп, құттықтап келген өздеріңізге зор алғысымды білдіремін. Аналық ақ тілегімді арнап, амандық пен әрбір істеріңіздің сәтті болуын тілеймін. Өзім көзбен көрген, өзім жүріп өткен жолдарды кейінгі буын лайықты жалғап, кезеңіне қарай жандандырып келеді. Әрқашан тілектеспіз, керек жерде бағыт-бағдарымызды, ақылымызды аямаймыз. Ақ ниет, адал қызметтің арқасында бүгінде бейнеттің зейнетін көріп отырған жайым бар. Қандай награда алсам да, ел-халықпен бірге жасалған жұмыстың нәтижесі, – деді абзал ана.

Айта кетейік, саналы ғұмырын халыққа қызмет ету жолына арнаған абзал жан бұған дейін Сырдария ауданының «Құрметті азаматы» атанған. Есімі «Алтын кітапқа» енген аяулы ана жетпіс бестен желдей есіп, жетпіс алтыны артқа тастап, мерейлі жетпістің жетеуіне зор құрметпен, лайықты наградамен қадам басқалы отыр. Ардақты ана бүгінгі күні де қоғам өмірінен бей-жай емес. Қысылтаяң сәтте аудандық басылым арқылы халыққа үндеу жариялап, қоғамдағы келелі мәселелерге қатысты көзқарасын білдіріп отырады.

Марапаттау рәсімінде әртүрлі салада қызмет атқаратын мамандар мен ұжымдарға түрлі номинациялар бойынша дипломдар мен естелік сыйлықтар табысталды. Сондай-ақ, Сырдария ауданының ауыл шаруашылығы саласы тұрақты дамып, егіншілік пен мал шаруашылығында өнімділік артты. Сонымен қатар, білім беру саласы, денсаулық сақтау саласының қызметкерлері, мәдениет пен спорт саласындағы мамандар марапатқа ие болды.