Облыс әкімі жауапты сала басшылары мен аудан әкімдеріне бірқатар тапсырма берді

26 қараша 2024, 10:43

1 366

Облыс әкімі Нұрлыбек Нәлібаев аймақтағы «Руханият орталықтары» мен физика-математика мектеп-интернаты құрылыстарына қатысты арнайы жиын өткізіп, жауапты сала басшылары мен аудан әкімдеріне бірқатар тапсырма берді, - деп хабарлайды "Opennews.kz" ақпарат агенттігі.

Қазір барлық ауданда облыстық бюджет есебінен «Руханият орталықтары», Қызылорда қаласында «Білімді қолдау қоры» есебінен дарынды балаларға арналған 300 орындық жатақханасы бар 400 орындық физика-математика бағытындағы мектеп-интернат құрылысы жүргізілуде.

Облыс әкімі аталған нысандардағы жұмыс бекітілген жобаға сәйкес жүргізілуі керек екенін атап өтіп, сапаға баса мән беруді тапсырды.

«Өздеріңізге белгілі, «Руханият орталықтарына» кітапхана, музей, архив, неке қию залы, жастар сарайы, ардагерлер мен аналар үйі орналасады. Ғимараттардың ішкі әрлеуі, қабырға және еден кафельдері, сыртқы абаттандыруы, асфальт және брусчаткасы сапалы әрі көрнекі болуы қажет. Өткен аптада мектеп-интернат құрылысымен таныстым. Бұдан бұрын нысанды жыл соңына дейін аяқтауды тапсырғанмын. Тиісті қаржы уақытылы әрі кедергісіз бөлінгенімен, құрылыс баяу жүруде. Құрал-жабдықтар, ғимаратқа қойылатын жиһаздар, жалпы айтқанда барлығы сапалы болуы керек. Тиісті басқарма басшылары, қала және аудан әкімдіктері, құрылыстың мерзімінде аяқталуын әрі сапалы салынуын қатаң бақылауға алыңыздар»,– деді Нұрлыбек Нәлібаев.

Аймақ басшысы барлық құрылыс алаңдарындағы жұмыс барысын бірінші басшылар үнемі бақылауда ұстауы керек екенін айтты.

Бұл жиналыс облыс әкімінің төрағалығымен өткен және оның барысында облыстың әлеуметтік-экономикалық дамуы, ауыл шаруашылығы, инфрақұрылым, білім және денсаулық сақтау салаларындағы мәселелер қаралған. Әкім нақты міндеттерді айқындап, жұмысын жақсарту бағытында тапсырмалар берді.

Әкім барлық аудан әкімдерінен және сала басшыларынан нақты нәтижелер мен есепті талап етіп, аймақтағы әлеуметтік мәселелерді шешу үшін үйлесімді жұмыс істейтінін атап өтті. Жергілікті басқару органдарының үйлесімді жұмысы мен жауапкершілігі аймақтың дамуына оң әсерін тигізетіндігі айтылды.