9-сынып оқушысынан ашық туберкулез анықталды

26 қараша 2024, 15:11

1 482

Алматы облысының Қаскелең қаласындағы А. Пушкин атындағы орта мектептің 9-сынып оқушысынан ашық формадағы туберкулез анықталды, - деп хабарлайды "Opennews.kz" ақпарат агенттігі.

Қарасай аудандық білім бөлімі хабарлағандай, 18 қарашада мектепке жылжымалы флюоромобиль жіберіліп, 15 жастағы оқушылар флюорографиядан өткен. 20 қарашада мектептің медбикесіне аудандық аурухананың фтизиатр дәрігерінен 9-сынып оқушысынан ашық формадағы туберкулез анықталғаны туралы хабарлама түскен. Оқушы 19 қарашадан бастап сабаққа қатыспаған.

Мектепте дереу санитарлық-эпидемиологиялық қауіпсіздік шаралары қабылданды: ауру анықталған сыныпта тазалық жұмыстары жүргізілді. Сынып оқшауланып, кабинетке 5% гипохлорит ерітіндісімен дезинфекция жасалды.

«Пән мұғалімдері мен кіші қызметкерлерге туберкулез туралы санитарлық-эпидемиологиялық түсіндіру жұмыстары жүргізілді. Ауру анықталған сынып оқушылары үшін оқшауланған түрде оқыту ұйымдастырылды. 22 қарашада сабақ аяқталғаннан кейін арнайы қызмет мектеп аумағында 4200 шаршы метр жерде дезинфекциялау жұмыстарын жүргізді», — делінген ресми хабарламада.

Қазіргі уақытта мектеп аудандық санитарлық-эпидемиологиялық бақылау бөлімінен (СЭС) тексеріс нәтижелерін күтуде. Алынған мәліметтерге байланысты қосымша шаралар қабылданады.