Қызылордада есірткі зертханасы жойылды

12 желтоқсан 2024, 09:14

1 409

Қызылорда облысында полиция қызметкерлері жедел-іздестіру іс-шараларын жүргізу барысында жергілікті тұрғын ұйымдастырған есірткі зертханасын анықтады, - деп хабарлайды "Opennews.kz" ақпарат агенттігі.

Оқиға орнында 52 жастағы ер адамның ұсталғаны белгілі болды. Ол сарайдың ішінде қабырғалары пластик фольгамен қапталған есірткі зертханасын жасаған.

«Тексеру кезінде есірткі өсіруге арналған жарықдиодты жарықтандыру құрылғылары мен суаруға қажетті құрал-саймандар тәркіленді. Зертхана ішінен 214 түп қарасора өсімдігі заттай дәлел ретінде алынды. Сараптама қорытындысына сәйкес тәркіленген есірткінің жалпы салмағы төрт келіге жуық болған. Сонымен қатар кептірілген шөп тәріздес ерекше хош иісі бар заттар: 8 газет қиындысына, 6 полиэтилен пакетіне және пластикалық бөтелкеге салынған есірткі табылды», - делінген хабарламада.

Сараптама нәтижесі бойынша, олардың жалпы салмағы 5,4 келіден астам кептірілген марихуана және 4,65 грамм гашиш екені анықталды. Айыпталушы тергеу кезінде қамауда болды. Сот шешімі бойынша ол 12 жылға бас бостандығынан айырылып, қылмыстық-атқару жүйесі мекемесінде жазасын өтейтін болды.