Қызылордада түзеу мекемесінен бір күнде үш сотталған бостандыққа шықты
Бүгін Қызылорда облысы бойынша Қылмыстық-атқару жүйесі департаментінің №37 мекемеде жазасын өтеген үш сотталған жаза мерзімінің аяқталуына байланысты бостандыққа шықты, - деп хабарлайды "Opennews.kz" ақпарат агенттігі.
Олар жол-көлік оқиғасына байланысты сотталған болатын.
Сотталғандардың бостандыққа шығуына орай мекемеде тәрбие бөлімінің ұйымдастыруымен “Қақпа алдында кездесу” атты іс-шара ұйымдастырылды. Бұл шараның негізгі мақсаты – бостандыққа шыққан азаматтардың қоғамға бейімделуіне қолдау көрсету. Іс-шараға пробация қызметінің инспекторы әділет майоры Жадыра Исмайлова, Қылмыстық жазасын өтеген адамдарды әлеуметтік бейімдеу орталығының маманы Нұртаева Раушан және Мансап орталығының маманы Әбдібек Дамир қатысты.
“Қақпа алдында кездесу” шарасы барысында сала мамандары сотталғандарға құқықтық, әлеуметтік және психологиялық көмек көрсетті. Оларға бостандыққа шыққаннан кейінгі алғашқы қадамдарын қалай жоспарлау керектігі түсіндіріліп, жұмысқа орналасу, құжаттарды рәсімдеу, сондай-ақ әлеуметтік қолдау алу мүмкіндіктері жайлы кеңестер берілді.
Шара барысында бостандыққа шыққан азаматтар ұйымдастырушыларға алғыстарын білдіріп, қоғамға бейімделу жолында бар күш-жігерін салатындарын айтты.
Оларды қақпа алдынан туған туыстары күтіп алды.
