Ер адам туған егіз балаларына зорлық көрсетті деп айыпталды
Атырау облысының тұрғыны күйеуінің туған егіз ұлы мен қызына жыныстық сипаттағы жәбір көрсетті деп айыптады, - деп хабарлайды "Opennews.kz" ақпарат агенттігі "Еуразия" бірінші арнасына сілтеме жасап.
Анасы бір жылдан астам уақыт әділдікке қол жеткізуге тырысып келеді. Іс екі рет тоқтатылып, қазір тергеу қайта жалғасып жатыр.
Мәліметтерге сенсек, балалар 2,5 жасқа толғанда, олардың анасы жұмысқа шығады. Ал күйеуі балалармен үйде қалады. Көп ұзамай анасы балалардың тұйық әрі жылауық болып кеткенін байқап, күмәндана бастайды. Кейінірек олардың біреуінен көгерген ізді көріп, көмек сұрауға шешім қабылдайды.
Психолог Маржан Елекұлова балалардың психикасына зақым алғанын растап, олардың денесінен жарақат белгілерін анықтады.
Балалардың анасы істің әдейі созылып жатқанын айтады. Себебі құқық қорғау органдарында күйеуінің туыстары жұмыс істейді деп күдіктенеді. Анасының айтуынша, тергеу сараптамаға байланысты тоқтатылған. Полиция оған медициналық тексеруден өту үшін өз бетінше маман табу қажет екенін айтқан. Ол дәрігерге жүгінгенімен, кейін оның тиісті лицензиясы жоқ екені анықталған.
Алайда заңгер Нұржан Рахметовтің пікірінше, полиция процессуалдық тергеу аясында қажетті медициналық тексеруді ұйымдастыруға міндетті.
Полиция өкілдері комиссиялық сараптама тағайындалғанын мәлімдеді. Оның нәтижесіне байланысты процессуалдық шешім қабылданады.
Айта кетейік, енді бұл балалар дәрігерлік тексеруден бесінші рет өтуі керек. Қазір анасы балаларының психологиялық және физикалық жағдайына алаңдаулы. Сонымен қатар күйеуінің жауапқа тартылмайтынына қорқады.
