Балабақшада тәрбиеші бір жасар қызды жұлқылап, қолын шығарып жіберген

7 ақпан 2025, 09:13

1 299

Маңғыстау облысында бір жасар қызды жұлқылап, қолын шығарып алған тәрбиеші жұмыстан қуылды, - деп хабарлайды "Opennews.kz" ақпарат агенттігі.

Бөбекжай қызметкері бүлдіршіннің қолын шығарып алған соң, алғашқы медициналық көмек те көрсетпеген. Баланың жарақат алғанын ата-анасы үйіне келгенде бір-ақ біліпті.

Ата-ана бейнебақылау камерасын тексерген кезде тәрбиешінің тыныш жүрген қыздың қолынан тартып көтеріп, орындыққа отырғызып жатқанын байқаған. Бірақ қыз жыламапты. Тек үйге барғанда қолының ауырып тұрғанын айтқан.

Бейнежазбаны көру барысында қызметкердің гигиена талаптарын сақтамай, екі ыдысқа құйылған сорпаны бір қасықпен 8 балаға бергені анықталды. Осы жайттардан кейін тәрбиешінің көмекшісі де жұмыстан босатылды. Мектепке дейінгі білім беру мекемесінің басшысы бұл оқиға абайсызда болған деп отыр.

“Тәрбиеші ол жерде тек баланы орнынан көтерген. Құзырлы органдар да ол видеоны көрді. Бұл жерде зорлық-зомбылық әрекеті жоқ. Ал тамақтандыруға келетін болсақ, қызметкер артық ыдыс-аяқтарды жуғысы келмей, өзінің жұмысын жеңілдету үшін солай жасаған. Сол күні мен жұмыста болмадым, жылдың басы болған соң балабақшаға өзгерістер енгізейін деп орталықтың шаруасымен сыртқа шығып кеткен едім”, – деді жекеменшік балабақшаның директоры Раушан Аяпбергенова.