Шымкент қаласының әкімінен тұрғын жылап тұрып баспана сұрады
5
12 наурызда Шымкент қаласының әкімі Ғабит Сыздықбеков Қаратау ауданының тұрғындарымен кездесті. Жиын барысында тұрғындардың бірі шаһар басшысынан жылап тұрып үй сұрады, - деп хабарлайды "Opennews.kz" ақпарат агенттігі.
Қала басшысы тұрғындармен кездесіп, мәселелерін тыңдады. Жиын барысында әкімнен 20 жылдан бері баспанасыз жүрген ер адам жылап тұрып баспана сұрады.
“Аға, маған көмектесіңіз! Қаңғып жүргеніме 20 жыл болды. Маған бір шатырымды сайлап беріңіз. Маған шаңырақ керек”, – деді тұрғын.
Тұрғынның өтінішін қала әкімі үнсіз тыңдады. Әкімдік мәліметінше, барлық азамат үйді заң бойынша тек кезекпен ала алады.
“Видеодағы азамат І және ІІ топ мүгедектігі бар тұлға ретінде 2017 жылдың 28 қарашасынан бастап мемлекеттік тұрғын үй алу кезегіне тіркелген. Қазіргі уақытта оның кезек нөмірі – 4834. Заңға сәйкес, мемлекеттік тұрғын үй кезек тәртібімен беріледі”, – делінген хабарламада.
