Балалардың “өліммен ойыны“ видеоға түсіп қалды

12 маусым 2025, 10:30

1 680

Қарағанды облысында үш оқушының жолда аса қауіпті әрекет жасаған сәті видеоға түсіп қалды. Теміртауда жасөспірімдер қозғалыстағы газельге жармасып, көлік жолымен сырғанаған. Бұл жағдай қоғамда алаңдаушылық тудырып отыр,- деп хабарлайды "Opennews.kz" ақпарат агенттігі.

Полиция жедел әрекет етіп, балалардың жеке тұлғаларын анықтады. Олардың жасы 10–11-де екені белгілі болды. Ата-аналарымен бірге олар полиция бөліміне жеткізілді. Енді бұл оқушылар мектепішілік есепке алынып, кәмелетке толмағандар істері жөніндегі комиссиямен кездеседі.

"Ата-аналар балаларын дұрыс тәрбиелемегені үшін әкімшілік жауапкершілікке тартылды. Материалдар кәмелетке толмағандар істері және олардың құқықтарын қорғау жөніндегі комиссияға жолданды. Полиция тәрбие шараларын елемеу ауыр салдарға әкелуі мүмкін екенін еске салып, балалармен қауіпсіздік туралы түсіндіру жұмыстарын жүргізуді сұрайды", – деп хабарлады Қарағанды облыстық ПД баспасөз қызметі.