Баспана берілді: Қоғамды дүрліктірген оқиғадан кейін қолдау көрсетілді
2 491
Алматы облысында ит талап, сан еті мен құлағын жұлып алған 10 жастағы Максимнің отбасы баспаналы болды, - деп хабарлайды "Opennews.kz" ақпарат агенттігі.
Мира Бейсен есімді желі қолданушысы Максимнің отбасына үй берілгенін айтып, қазақстанстандықтардан сүйінші сұрады.
“Хамеевтің иті талап, өлтіріп қоя жаздаған 10 жастағы Максим естеріңізде ме? Головачев отбасына ауданы 80 шаршы метрлік төрт бөлмелі үй берілді. Баланы құтқарып қалған Серікбек Сақайбеков марапатталды. Баланың жағдайы жақсарып келе жатыр. Жақында ауруханадан шығарады. Енді ұзақ уақыт реабилитациядан өту керек. Бірақ халқым оны қиын жағдайда алдырмайды деп ойлаймын. Бұл халқымның жүрегінің кеңдігінің көрінісі”, – деп жазды Мира Бейсен.
Желі қолданушысының айтуынша, қор оқырмандарынан ақша жинап, көпбалалы отбасыға үй алып берген.
“Көпбалалы отбасы, пәтерді жалдап тұрады. Үлкен ұлынің мүгедектігі бар. Анасы жұмыс істемейді, кішкентай баламен үйде отырады. Үйді бір қор оқырмандарының ақшасына алып берді”, – делінген жазбада.
Еске салсақ, 30 маусымда Алматы облысы Қарасай ауданына қарасты Ұмтыл ауылдық округінде ойнап жүрген 10 жастағы баланы екі қабаған ит талап, ауыр жарақаттады. Құтқарушылар жеткенше иттер баланың сан етін, құлағын жұлып алған. Қасындағы балалардың жанұшыра айғайынан кейін көмекке келген 65 жастағы такси жүргізушісі бәкісімен иттерге қарсы шабуылдап, оның өмірін аман алып қалды.
