"Сергек" камерасына мылтықпен оқ атып, жауапқа тартылды
Жамбыл облысындағы Байзақ аудандық соты “Сергек” камерасын қасақана бүлдірген жергілікті тұрғынға қатысты әкімшілік істі қарады,- деп хабарлайды Оpennews.kz ақпарат агенттігі:
Іс “бөтеннің мүлкін қасақана жою немесе бүлдіру” дерегі бойынша қаралған.
Соттың мәліметінше, күдікті 2025 жылдың желтоқсанында Сарыкемер – Түймекент – Ақшолақ тасжолында жол қозғалыс ережелерін бұзғандарды автоматты түрде тіркейтін “Сергек” камерасына пневматикалық мылтықпен оқ атып, қасақана бүлдіргенін анықтаған.
Қазақстанда "Сергектен” келген айыппұлды өшіріп беремін" деп алдайтын алаяқтар да көбейген.
Сот отырысында күдікті өз кінәсін толық мойындап, келтірілген залалдың бір бөлігін өтегенін айтқан. Ал жәбірленуші тарап шығынның толық өтелмегенін мәлімдеді.
Сот азамат М-ні кінәлі деп танып, оған 196 мың теңге көлемінде айыппұл салған. Жеңілдететін мән-жай ретінде айыпталушының кінәсін мойындауы ескерілді. Сот қаулысы заңды күшіне енген.
