Ер адам үш баласы бар әйелге алданып "қалың мал" берген

3 ақпан 2026, 12:30

1 511

Ақмола облысы Қосшы қаласында 28 жастағы ер адам әлеуметтік желіде танысқан қалыңдығына алданып қалған,- деп хабарлайды Оpennews.kz ақпарат агенттігі.

"Алаяқтық фактісі туралы арыз 31- ші қаңтарда Қосшы қаласының полиция бөліміне келіп түсті. Ер адам үйлену тойына дайындыққа және қалың малға деген 1,5 млн теңге сомасындағы қаражатты жігіттің бірге тұратын қызы алаятық жолмен иемденіп кеткен", - дейді полиция.

Арызданушы былтыр тамызда қызбен әлеуметтік желілер арқылы танысқан. Жаңа танысы өзін Шымкент қаласының тумасы ретінде таныстырып, оның отбасы сол жерде тұратынын айтқан. Бірнеше кездесуден кейін қыз бен жігіт бірге тұрамыз деп шешіп, елордадан пәтер жалдаған.

"Ештеңеден күдігі болмаған ер адам қызды ата-анасымен таныстырған. Ал қыз өз кезегінде жігітті туыстарымен таныстыруға еш асықпаған. Алайда жігіт бұған мән бермеген.
Бір жарым ай бірге тұрған соң қыз жүктілік туралы хабарлаған. Қуанышты хабарды естіген жігіт қарым-қатынасты заңдастыру және үйлену тойына дайындықты бастап кеткен", - дейді департамент.

Ақша үнемдеу мақсатында қыз бен жігіт Астанадан Косшы қаласына көшіп, пәтер жалдап тұрған.

"Жігіттің ата-анасы болашақ ерлі-зайыптыларға өз пәтерлерін сатып алуға көмек ретінде 950 000 теңге берген, сондай-ақ болашақ келіні үшін 600 000 теңгеден астам сомаға алтын әшекейлер сатып алған. Алайда одан кейін қыз байланысқа шығуды тоқтатып, қоңыраулар мен хабарламаларға жауап бермеген", - дейді Ақмола облыстық полиция департаменті.

Кейін оның бұрын тұрмыс құрғаны және үш баласы бар екені анықталған. Алдаудың құрбаны болғанын түсінген ер адам полицияға арызбен жүгінген.

Қазіргі уақытта алаяқтық бойынша қылмыстық іс қозғалған. Қыздың орналасқан жерін анықтауға бағытталған жедел-іздестіру іс-шаралары жүргізілуде.