Есірткі саудасына қатысы бар 11 күдікті ұсталды
Алматы қаласы мен Алматы облысында интернет арқылы синтетикалық есірткі таратумен айналысқан ұйымдасқан қылмыстық топтың жолы кесілген,- деп хабарлайды Оpennews.kz ақпарат агенттігі.
Ішкі істер министрлігі “Заң мен тәртіп” қағидаты аясында есірткі қылмысына қарсы күресті күшейтіп жатыр.
Ведомствоның Есірткі қылмысына қарсы іс-қимыл комитеті Алматы қаласы мен Алматы облысының аумағында есірткі заттарын интернет арқылы байланыссыз тәсілмен таратқан интернет-дүкеннің қызметін тоқтатқан.
Жедел-іздестіру іс-шаралары барысында қылмыстық топтың 11 қатысушысы ұсталған. Олардың қатарында ұйымдастырушылар, операторлар және заңсыз қызметті қаржылық жағынан қамтамасыз еткен тұлғалар бар.
Арнайы операция кезінде заңсыз айналымнан шамамен 3 келі синтетикалық есірткі тәркіленген. Сонымен қатар қылмыстық схеманы үйлестіруге пайдаланылған байланыс құралдары, банк карталары және цифрлық тасымалдағыштар алынған.
Аталған дерек бойынша сотқа дейінгі тергеп-тексеру басталды. Құқық қорғау органдары интернет арқылы есірткі сатумен айналысатын заңсыз арналардың жолын кесу бағытындағы жұмысты жалғастырып жатқанын мәлімдеген.
