Қазақстанда жүргізуші куәлігі мен мүлікті тіркеу саласында жемқорлық әшкереленді

Қазақстанда мемлекеттік қызметтер көрсету барысында сыбайлас жемқорлық әрекеттері тіркелген,- деп хабарлайды Opennews.kz  ақпарат агенттігі BAQ.KZ сайтына сілтеме жасап.

Ведомство мәліметінше, 2026 жылдың басынан бері Астана қаласы, Ақмола және Павлодар облыстарында автомектептердің қызметін ұйымдастыру және жүргізуші куәліктерін беру кезінде заңсыз сыйақы алу және қызметтік өкілеттіктерді теріс пайдалану деректері анықталған. Астанада Мамандандырылған Халыққа қызмет көрсету орталығының бұрынғы басшы орынбасары азаматтарға жүргізуші куәлігін алу үшін жүйелі түрде пара алғаны үшін әшкереленген. Тергеу барысында жалпы сомасы 100 миллион теңгеден асатын 60-тан астам факт тіркелген.

Көкшетау қаласындағы ХҚКО және Екібастұздағы «Азаматтарға арналған үкімет» филиалдарының басшылары жалған тұлғалар арқылы емтихан тапсыруды ұйымдастырып, ақша алғандары анықталған. Астана, Шымкент және Тараз қалаларындағы «Азаматтарға арналған үкімет» филиалдарында жылжымайтын мүлікті қайта тіркеу және ауыртпалықтарды алып тастау кезінде қызметтік өкілеттіктерді теріс пайдалану және заңсыз баю фактілері тіркелген. Деректер бойынша сотқа дейінгі тергеп-тексеру жүргізілуде. Қылмыстық-процестік кодекстің 201-бабына сәйкес өзге ақпарат жарияланбайды.