Алаяқтықпен айналысқан ерлі-зайыпты әшкереленді

200 млн теңге жымқырып алаяқтық жасаған ерлі-зайыптылар ұсталды,- деп хабарлайды Opennews.kz ақпарат агенттігі Kaz.inform.kz сайтына сілтеме жасап.

Криминалдық полиция департаментінің қызметкерлері халықаралық іздеуде жүрген 40 жастағы ер адам мен оның 45 жастағы жұбайын Жамбыл облысының аумағында ұстаған. Тергеу мәліметінше, күдіктілер азаматтардың сеніміне кіріп, түрлі сылтаулармен Астана және Семей қалаларының тұрғындарынан ірі көлемде ақша алған. Жалпы келтірілген шығын көлемі шамамен 200 млн теңгені құраған.

Жедел-іздестіру іс-шаралары барысында олардың ұзақ уақыт бойы Жамбыл облысындағы елді мекендердің бірінде таныстарының үйінде жасырынып жүрген. Күдіктілер құқық қорғау органдарынан бой тасалап жүрген.

Қазіргі уақытта ерлі-зайыпты уақытша ұстау изоляторына қамалған. Аталған факті бойынша сотқа дейінгі тергеу амалдары жүргізіліп жатыр. Құқық қорғау органдары олардың басқа да қылмыстарға қатысы бар-жоғын тексеруде.