Базарда қалдырылған бастың күдіктісі аспан түстес куртка киген

13 сәуір 2023, 12:11

182

Куәгерлер әйелдің басын дүкенге тастап кеткен адамды сипаттап берді,- деп хабарлайды "Opennews.kz" ақпарат агенттігі.

Сұмдық қылмысқа барған, онымен қоймай, базарда бас салынған пакетпен емін-еркін тайраңдаған күдікті әлі күнге дейін қолға түспеді. Бетперде киген бәзбіреу адам басы салынған пакетті базарға тастап кеткен. Шұжық дүкенінің сатушылары затын ұмытты екен деп, ер адамның соңынан сыртқа шықса, ол ізім-ғайым жоғалған.

Пакеттің ішіндегі басты көрген саудагерлер бірден полиция шақыртқан. Ал марқұмның денесі басқа жерден табылды. Алдияр Әбиболла – күдіктіні өз көзімен көрген куәгердің бірі.

«Осы жерде жүрді күдікті, очки киіп алған, маскада. Көк аспан көк бар ғой, сондай курткамен ары-бері жүрген еді. Пакетті ол біздің көрші дүкенге, сол жерге тастады. Дүкеннің ішіне тастады. Сосын сыртта тексеріп ашып қараса, адамның басы екен», – дейді саудагер Алдияр Әбиболла.

Күдікті қолындағы пакетті шамамен түскі 12 шамасында шұжық сататын дүкенге тастапты. Оған дейін базар ішін арлы-берлі 3-4 рет айналып жүрген көрінеді. Пакетті ашқанда ішіндегі басты көріп, шалқасынан түсе жаздаған сатушы әлі өз-өзіне келе алар емес. Сұмдық қылмысқа барған, онымен қоймай, базарда бас салынған пакетпен емін-еркін тайраңдаған күдікті қолға түспеді. Ал марқұмның денесі басқа жерден табылды. Тәртіп сақшылары өлген әйелдің кім екенін анықтады.

"Тұрақты тұрғылықты жері жоқ, бұрын есірткі қылмысы үшін бірнеше рет сотталған. Біраз уақыттан кейін сол маңдағы сауда орындарының бірінен әйелдің басы табылды. Қазіргі уақытта аталған дерек бойынша Түрксіб аудандық полиция Басқармасымен ҚР ҚКнің 99-бабы бойынша қылмыстық іс тіркелді. Қылмысты ашуға және оның мән-жайын анықтауға бағытталған жедел іс-шаралар кешені жүргізілуде," – деп түсінік берді Алматы қаласы ПД ресми өкілі Салтанат Әзірбек.

Әдетте ығы-жығы базардың көшесінде бүгін ұшқан шыбынның ызыңы естілмейді. Полиция жолдың екі бетін де жауып тастаған. Басты назар қоршауға алынған аумақтағы жерде жатқан пакетте. «Ішіндегісі бас па?» деген сұраққа, саудагерлер үнсіз бас шұлғиды.