Қазақстанның бірнеше аймақтарында жүзден астам қару-жарақ тәркіленді

Ұлттық қауіпсіздік комитеті полиция және прокуратура органдарымен бірлесіп, еліміздің түрлі өңірлерінде қарудың заңсыз айналымының жолын кесуге бағытталған жедел-іздестіру шараларын жүргізді,- деп хабарлайды Opennews.kz ақпарат агенттігі Massaget.kz сайтына сілтеме жасап.

ҰҚК мәліметінше, 2026 жылғы 31-ші наурыздағы жағдай бойынша жүргізілген жедел іс-шаралар нәтижесінде заңсыз айналымнан 118 бірлік қару-жарақ алынған. Оның ішінде 6 «Калашников» автоматы, 83 аңшылық және тегіс ұңғылы мылтық, 29 тапанша, сондай-ақ 15 граната мен 859 дана оқ-дәрі тәркіленген.

Ведомство өкілдерінің хабарлауынша, анықталған деректер бойынша сотқа дейінгі тергеп-тексеру амалдары жалғасып жатыр. Қазіргі уақытта құқық қорғау органдары қару-жарақтың шығу тегі мен оны заңсыз сақтаған және таратқан тұлғаларды анықтау бағытында жұмыс жүргізуде.

Сонымен қатар, мамандар мұндай қарулардың заңсыз айналымы қоғамдық қауіпсіздікке айтарлықтай қатер төндіретінін атап өтеді. Осыған байланысты алдын алу және бақылау шаралары күшейтілген. Қылмыстық-процестік кодекстің 201-бабына сәйкес, тергеу мүддесіне байланысты өзге мәліметтер жария етілмейді.