Жоғалған баланы табу үшін арнайы топ құрылды

31 наурыз 2026, 15:30

1 508

Ақтөбеде жоғалған баланы іздеу үшін 10 топ құрылды, - деп хабарлайды Opennews.kz ақпарат агенттігі Kaz.inform.kz сайтына сілтеме жасап.

Із-түзсіз жоғалған 10 жастағы баланы іздеу жұмыстары ауқымды түрде жалғасып жатыр. Құтқарушылар мен арнайы қызмет өкілдері өзен аумағын және жағалау бөліктерін қатар тексеруде. Іздеу шаралары Сарыжар ауылынан Мәртөк бағытына дейінгі аралықты қамтып, бірнеше бағыт бойынша ұйымдастырылған.

Төтенше жағдайлар қызметінің мәліметінше, іздестіру барысында сүңгуірлер бірнеше мәрте суға түсіп, өзен түбін тексерген. Моторлы қайықтардың көмегімен ондаған шақырым аумақ қамтылып, жағалау сызығы да мұқият қаралған. Жұмысқа ондаған маман, арнайы техника, ұшқышсыз ұшу аппараттары мен әуе көлігі тартылған. Іздеу шаралары тәулік бойы жалғасуда.

- Іздеу жұмыстары екінші күн қатарынан жүріп жатыр. Жоспар бойынша 10 топ құрылып, оқиға болған Сарыжар ауылынан Мәртөк ауылына дейін жүріп өтеміз. Өзеннің арғы беті мен бергі беті, өзен түгел тексеріледі. Көктем болған соң өзендегі су ағысы күшейіп тұр. Бұл іздеу жұмысын қиындатады, - деді Ақтөбе облыстық ПД бастығының орынбасары Ардана Саймағамбетов.