Зейнеткерлерді алдаған бұрынғы банк қызметкері ұсталды
Қарағанды облысында банктің бұрынғы қызметкері алаяқтық жасады деген күдікке ілінді, - деп хабарлайды Opennews.kz ақпарат агенттігі kaz.tengrinews.kz сайтына сілтеме жасап.
Қарағанды облысының Осакаров ауданында қаржылық алаяқтыққа күдікті ретінде банктің бұрынғы менеджері қолға түсті. Ол зейнеткерлердің атына несие рәсімдеп, қаражатты өз пайдасына пайдаланған болуы мүмкін. Полицияға 67 жастағы аудан тұрғыны шағым түсірген. Әйел өзінің атына шамамен 1,5 миллион теңге көлемінде несие рәсімделгенін, алайда ол туралы ешқандай хабар болмағанын айтқан. Ол несие алуға өтініш бергенімен, банк тарапынан өтініші қабылданбады деп ойлаған.
Тергеу барысында күдікті ретінде 36 жастағы бұрынғы банк менеджері анықталды. Құқық қорғау органдарының нұсқасы бойынша, ол клиенттің тапсырған құжаттарын пайдаланып, мақұлданған қаражатты жәбірленушіге хабарламай өз есепшотына аударып отырған. Кейін мұндай тәсілмен алданғандардың саны бірнеше адамға жеткені белгілі болды. Барлығы да егде жастағы тұрғындар екені нақтыланған.
Сотқа дейінгі тергеу амалдары жалғасуда. Полиция азаматтарды қаржылық құжаттарды рәсімдеу кезінде сақ болуға және күмәнді жағдайлар туындаған жағдайда бірден құқық қорғау органдарына жүгінуге шақырды.
