Ер адам бұрынғы сүйіктісін сотқа беріп, 2,5 млн теңге талап етті
Жамбыл облысындағы Қордай аудандық соты 2,5 млн теңгені өндіріп алу туралы азаматтық істі қарады,- деп хабарлайды Opennews.kz ақпарат агенттігі Baq.kz сайтына сілтеме жасап.
Сот материалдарына сәйкес, ер адам бойжеткенмен шамамен 4–5 ай бойы жақын қарым-қатынаста болып, екеуі болашақта отбасын құруды жоспарлаған. Осы уақыт аралығында ол әйелге және оның екі баласына тұрмыстық және материалдық қолдау көрсету мақсатында түрлі сомада ақша аударып отырған. Араларындағы қарым-қатынас тоқтағаннан кейін ер адам бұрын аударған қаражаттарының барлығын қайтаруды талап еткен. Бойжеткен бұл талаппен келіспей, ер адамды бұғаттап тастаған. Осыдан кейін ол сотқа жүгініп, жауапкерден 2 500 000 теңге көлеміндегі қаражатты және мемлекеттік баж салығын өндіріп алуды сұраған.
Жауапкер өз кезегінде талап арызды мойындамай, ер адамның аударған қаражаттары оның өз еркімен берілген материалдық көмек екенін түсіндірген. Сондай-ақ ол бұл қаражаттың бір бөлігі күнделікті қажеттіліктерге, соның ішінде дәрі-дәрмек, киім-кешек және балалардың тұрмыстық шығындарына жұмсалғанын айтқан. Іс бойынша тараптардың уәждері сотта қаралып жатыр.
